Երևանն ու Սանկտ Պետերբուրգը նախատեսում են համագործակցության ծրագիր ստորագրել
ԱշխարհՍանկտ Պետերբուրգի պատվիրակությունը` նահանգապետ Գեորգի Պոլտավչենկոյի գլխավորությամբ, ապրիլի 29-ից մայիսի 2-ը կայցելի Երևան: Այս մասին հայտնել է ՌԻԱ «Նովոստին»` հղում անելով հյուսիսային մայրաքաղաքի մամուլի ծառայությանը:
Այցի շրջանակում ծրագրված են Պոլտավչենկոյի հանդիպումները Հայաստանի նախագահ Սերժ Սարգսյանի և Երևանի քաղաքապետ Տարոն Մարգարյանի հետ:
«Տարոն Մարգարյանի հետ բանակցությունների արդյունքում նախատեսվում է ստորագրել առևտրատնտեսական, գիտատեխնիկական և հումանիտար համագործակցության ծրագիր Սանկտ Պետերբուրգի կառավարության և Երևանի քաղաքապետարանի միջև»,- հստակեցվում է հաղորդագրության մեջ:
Պետերբուրգի գուբերնատորը կմասնակցի շրջափակված Լենինգրադի երեխաներին նվիրված հուշարձանի բացմանը, կհանդիպի Հայաստանում բնակվող` բլոկադան վերապրած անձանց հետ, ծաղիկներ կդնի Ծիծեռնակաբերդի հուշահամալիրի և Հաղթանակի այգու Անմար կրակի մոտ, կայցելի Հայոց ցեղասպանության թանգարան։ Պոլտավչենկոն նաև զեկույցով հանդես կգա «Սանկտ Պետերբուրգն ու Երևանն ընդլայնում են գործակցության հորիզոնները» համաժողովի լիագումար նիստում:
Պետերբուրգի պատվիրակությունը կայցելի նաև Երևանի Պուշկինի անվան №8 դպրոց և ուսումնամեթոդական գրականության կհանձնի դպրոցին: Նաև կստորագրվի գործակցության համաձայնագիր Երևանի դպրոցի և Պետերբուրգի Կալինինի շրջանի № 619 դպրոցի միջև: Պետերբուրգի պատվիրակությունը կայցելի նաև Էջմիածին, որտեղ մարզպետը կհանդիպի Ամենայն Հայոց Գարեգին Բ Կաթողիկոսի հետ: