«Ես բացարձակ իմունիտետ ունեմ ադրբեջանական խավիարի դեմ». ԵԽ պատգամավոր
ՔաղաքականԱդրբեջանական կողմը, գործի դնելով իր ֆինանսական ռեսուրսները, ձգտում էր խոչընդոտել մայիսի 3-ին Արցախի խորհրդարանական ընտրություններում դիտորդական առաքելություն իրականացնող Եվրոպական խորհրդարանի պատգամավորների աշխատանքները, ինչը չի հաջողվել: «Ես բացարձակ իմունիտետ ունեմ ադրբեջանական խավիարի դեմ: Նրանք գուցեև շատ ֆինանսական միջոցներ ունեն իրենց նպատակներին հասնելու համար, ս ակայն մեր միջոցներն են արդարությունը և մեր գաղափարները»,- «Արմենպրես»-ի մամուլի սրահում մայիսի 4-ին հրավիրված ասուլիսին նման հայտարարություն արեց ԼՂՀ խորհրդարանական ընտրություններում Եվրոպական խորհրդարանի պատգամավորներից կազմված միջազգային դիտորդական առաքելության ղեկավար Ֆրանկ Էնգելը՝ պատասխանելով լրագրողի այն հարցին, թե Եվորպական խորհրդարանում մեծ ազդցություն ունի «խավիարային դիվանագիտությունը», և արդյոք դիտորդական առաքելություն իրականացնող պատգամավորները մտավախություն չունեն, որ նավթադոլարների միջոցով Ադրբեջանը կարող է հետապնդումների դիմել:
ԵԽ պատգամավորը նաև տեղեկացրեց, որ դեռևս 2014 թվականին Եվրոպական խորհրդարանում Արցախի հետ բարեկամության խմբի ստեղծման ժամանակ մեղադրանքներ է ստացել ադրբեջանական լրատվամիջոցների կողմից: «Ադրբեջանական թերթերից մեկը մի հոդված էր հրապարակել, որտեղ ինձ մեղադրում էր հաջորդ պատերազմը հրահրելու մեջ: Ես ուզում եմ հավատացած լինել, որ պատերազմ տեղի չի ունենա և Ադրբեջանը կմեղմի իր ագրեսիան ոչ միայն Արցախի և Հայաստանի ժողովրդի դեմ, այլև այն մարդկանց, ովքեր դիտորդական առաքելություն են իրականցնում և ձգտում են ժողովրդավարական և արդարացի արդյունքների հասնել»,- հավելեց Էնգելը: