ՄԱԿ-ը Սաուդյան Արաբիայից պահանջել է դադարեցնել Եմենի օդանավակայանների ռմբակոծությունները
ԱշխարհՄԱԿ-ը Սաուդյան Արաբիայի գլխավորությամբ ռազմական դաշինքից պահանջել է դադարեցնել Եմենի մայրաքաղաք Սանայի միջազգային օդանավակայանի ռմբակոծություները:
Ինչպես հաղորդում է «Արմենպրես»-ը՝ վկայակոչելով միջազգային լրատվամիջոցները, մարդասիրական հարցերով ՄԱԿ-ի ներկայացուցիչ Յոհաննես Վան Դեր Կլաուֆը նշել է, որ ռմբակոծությունների հետևանքով լուրջ վնասներ են կրել օդանավակայանի թռիչքավայրէջքային ուղիները:
Նա կոչ է արել դադարեցնել ռմբակոծությունները բոլոր օդանավակայաններում, որպես հնարավոր լինի մարդասիրական հարցերով ներկայացուցիչներին տեղափոխվել մի շրջանից մյուսը: «Հակառակ դեպքում մարդասիրական կազմակերպությունները չեն կարող տրամադրել աշխատակիցների, անհրաժեշտ դեղորայք կամ այլ անհրաժեշտ իրեր»,- ավելացրել է նա:
Նախորդ շաբաթ ՄԱԿ-ը Սաուդյան Արաբիայի՝ Եմենի օդանավակայնների ռմաբակոծությունները համարել էր միջազգային հումանիտար իրավունքի լուրջ խախտում: Գլխավոր քարտուղար Պան Կի Մունը Եմենի հակամարտող կողմերին կոչ էր արել դադարեցնել ռազմական գործողությունները, որպեսզի հնարավոր լինի մարդասիրական օգնություն տրամադրել կարիքավորներին:
Սաուդյան Արաբիայի գլխավորությամբ «Վճռականության փոթորիկ» գործողություններն սկսվել են մարտի 26-ի գիշերը: Սաուդյան Արաբիային աջակցում են Բահրեյնը, Կատարը, Քուվեյթը և ԱՄԷ-ն: Դաշինքն ապրիլի 21-ին հայտարարել էր գործողությունների ավարտի և միաժամանակ նոր գործողություն սկսելու մասին, որը կրում է «Հույսի վերականգնում» անվանումը: