«Արևելյան գործընկերության» գագաթնաժողովը մեկնարկել է աշխատանքային ընթրիքով
ՔաղաքականԼատվիայի մայրաքաղաք Ռիգայում ԵՄ «Արևելյան գործընկերության» գագաթնաժողովը մեկնարկել է երեկոյան աշխատանքային ընթրիքով: Ինչպես փոխանցում է «Արմենպրես»-ը' վկայակոչելով գագաթնաժողովի պաշտոնական կայքը, ընթրիքից առաջ գագաթնաժողովի մասնակից երկրների նախագահներին ու կառավարությունների ղեկավարներին դիմավորել և ողջունել է Լատվիայի նախագահ Անդրիս Բերզինշը:
Մայիսի 22-ին կկայանա գագաթնաժողովի պաշտոնական նիստը:
«Արևելյան գործընկերության» գագաթնաժողովին մասնակցելու նպատակով Ռիգա է մեկնել նաև ՀՀ նախագահ Սերժ Սարգսյանը:
Եվրահանձնաժողովի մամուլի ծառայության տեղեկատվության համաձայն՝ գագաթնաժողովի աշխատանքին մասնակցում են ԵՄ-ի 28 երկրների ղեկավարները եւ գործընկերության ծրագրի մասնակից վեց պետությունների ներկայացուցիչները: Միջոցառումը նախագահում է է Եվրոպական խորհրդի ղեկավար Դոնալդ Տուսկը, ԵՄ-ի ինստիտուտներից կլինեն նաեւ, մասնավորապես, Եվրահանձնաժողովի ղեկավար Ժան Կլոդ Յունկերը, ԵՄ-ի դիվանագիտության ղեկավար Ֆեդերիկա Մոգերինին, հարեւանության եւ ընդլայնման քաղաքականության հարցերով եվրահանձնակատար Յոհաննես Հանը եւ առեւտրի հարցերով եվրահանձնակատար Սեսիլիա Մալսթրյոմը:
Գործընկեր վեց երկրների թվում Հայաստանը ներկայացնում է նախագահ Սերժ Սարգսյանը, Վրաստանը՝ վարչապետ Իրակլի Ղարիբաշվիլին, Ուկրաինան՝ նախագահ Պյոտր Պորոշենկոն, Մոլդովան՝ հանրապետության ղեկավար Նիկոլայ Տիմոֆտին: Բելառուսը կներկայացնի հանրապետության արտաքին գործերի նախարար Վլադիմիր Մակեյը, Ադրբեջանը՝ նախագահական վարչակազմի ներկայացուցիչ Նովրուզ Մամեդովը եւ ԱԳ նախարար Էլմար Մամեդյարովը:
Փորձագիտական շրջանակները նշում են, որ գագաթնոժողովում, հնարավոր է, ազդարարվի ՀՀ-ԵՄ բանակցությունների մեկնարկի մասին: