Նախորդ տարի ՀՀ քաղաքացիություն է ստացել ավելի քան 3000 սիրիահայ
ՀասարակությունՀայաստանի Հանրապետության քաղաքացիություն 2014 թվականին ստացել է 13 266 մարդ, իսկ քաղաքացիությունից հրաժարվել է 2 00 անձ: Քաղաքացիություն ստացածներից 3 հազար 613 սիրիահայեր են եղել: Այս մասին այսօր Պետբյուջեի 2014թ․ կատարողականի հաշվետվության քննարկման ժամանակ ասաց ՀՀ նախագահի աշխատակազմի ղեկավար Վիգեն Սարգսյանը:
«Մեզ համար ցանկացած անձի քաղաքացիությունից դուրս գալը մտահոգիչ է, բայց դա քաղաքացու իրավունքն է' Սահմանադրությամբ ամրագրված: Միշտ լինելու են քաղաքացիներ, որոնք նախընտրելու են այլ երկրի քաղաքացիություն ձեռք բերել: Լինում են խառն ամուսնություններ, երեխաներ, ովքեր ծնվել են Հայաստանում, այնուհետև ծնողների քաղաքացիությունը փոխվել է, այժմ էլ նրանք են փոխում»,- ասաց Սարգսյանը:
Սարգսայնը նկատեց, որ թվերը վերլուծելիս պետք է հաշվի առնել հարևան երկրերի, ավանդական սփյուռքի երկրների քաղաքացիությանը վերաբերող օրենսդրության խստացումներն ու մեղմացումները, որոնք ուղղակիորեն ազդում են քաղաքացիություն ստանալու կամ դրանից հրաժարվելու հարցին:
«Քաղաքացիությունից դուրս եկածների մեծ մասը Հայաստանում մշտապես չբնակվող անձինք են, ովքեր իրենց մշտական բնակության երկրում քաղաքացիության օրենսդրության խստացման արդյունքում հրաժարվել են հայկական քաղաքացիությունից: Նրանց մեջ գրեթե չկան մարդիկ, ովքեր Հայաստանը լքելով են դուրս գալիս քաղաքացիությունից»,- ասաց Սարգսյանը: