Քենիացին պատրաստ է 70 ոչխար և 50 կով տալ Օբամայի դստեր հետ ամուսնանալու համար
ԱշխարհՔենիացի իրավաբան Ֆելիքս Կիպրոնոն հայտարարել է, որ ցանկանում է ամուսնանալ ԱՄՆ-ի նախագահ Բարաք Օբամայի ավագ դստեր՝ Մալիայի հետ և պատրաստ է հարսնացուի համար տալ 70 ոչխար, 50 կով և 30 այծ: Այդ մասին, ինչպես տեղեկացնում է «Արմենպրես»-ը, գրել է Washington Times-ը:
Ինչպես Կիպրոնոն հայտնել է Նայրոբիի թերթերից մեկին, նա արդեն վաղուց է երազում կնության առնել 16-ամյա Մալիա Օբամային:
«Աղջիկն ինձ հետաքրքրել է 2008 թվականից: Ճիշտն ասած, ես մինչ այժմ ոչ ոքի հետ չեմ հանդիպել, քանի որ խոստացել եմ հավատարիմ լինել նրան»,-ասել է տղամարդը:
Կիպրոնոն պլանավորում է Օբամայի դստերը առաջարկություն անել ԱՄՆ-ի նախագահի՝ հուլիսին Քենիա կատարելիք այցի ժամանակ: «Այժմ ես պատրաստվում եմ նամակ ուղարկել Բարաք Օբամային՝ ուղևորության ընթացքում Մալիային իր հետ վերցնելու խնդրանքով»,-հայտարարել է նա:
Տղամարդը նաև հավաստում է, որ Բարաք Օբամայի ավագ դստեր նկատմամբ իր սերը «իսկական» է և բանն ԱՄՆ-ի նախագահի ընտանիքի փողերի մեջ չէ: Նա նաև հայտարարել է, որ հարսնացուի համար պատրաստ է տալ 70 ոչխար, 50 կով և 30 այծ:
«Ես Մալիային կսովորեցնեմ կով կթել, ուգալի (եգիպտացորենի շիլա) պատրաստել և մուրսիկ անել (Քենիայում ավանդական կաթնամթերք), ինչպես դա կարողանում են անել քալենջին էթնիկ խմբի մյուս կանայք»,-հավելել է Ֆելիքս Կիպրոնոն:
Բարաք Օբաման երկու դուստր ունի. ավագը՝ Մալիա Էննը, ծնվել է 1998 թվականին: ԱՄՆ-ի նախագահի կրտսեր դուստրը՝ Նատաշան, ծնվել է 2001 թվականին, հաղորդել է ՌԻԱ Նովոստին: