Բաղրամյան պողոտայում նստացույցը շարունակվում է (ուղիղ միացում, լրացվում է)
ՀասարակությունԱրդեն 9-րդ գիշերը ցուցարարները լուսացրին Բաղրամյան պողոտայում:
20.40
ՀՀ ոստիկանության քրեական հետախուզության գլխավոր վարչության անչափահասների իրավունքների պաշտպանության և ընտանեկան բռնության դեմ պայքարի վարչության պետ, ոստիկանության գնդապետ Նելլի Դուրյանը Բաղրամյան պողոտայում է. «Բաղրամյան պողոտան զբոսանքի տեղ չէ, երեխաների տեղ չէ»,- ասաց նա:
18.00
Թեպետ այս պահին Բաղրամյանն այնքան էլ մարդաշատ չէ, բայց աշխատանքային ժամի ավարտին մարդկային հոսք սկսեց դեպի պողոտա: Քաղաքացիների մի մասը իրազեկման երթ են կազմակերպում, նրանց ձեռքին կան տարբեր գրություններով պաստառներ:
14.00
Բաղրամյան պողոտայում քաղաքացիներից մեկի ինքնազգացողությունը վատացավ: Շտապ օգնության բժիշկները ցուցաբերեցին առաջին օգնություն:
11.20
Մի խումբ երեխաներ են եկել Բաղրամյան պողոտա` սատարելու բողոքի ցույցի մասնակիցներին: Նրանք երգեցին նաև ՀՀ հիմնը և արժանացան ծափահարությունների:
10.05
Դավիթ Սանասարյանը խորհուրդ տվեց հացադուլ հայտարարած քաղաքացիների հետ քիչ շփվել, որպեսզի խնայեն այդ մարդկանց էներգիան:
Նա անդրադաձավ նաև ալկոհոլ օգտագործած մարդկանց, և հորդորեց պահպանել համակեցության կանոնները:
09.30
Ոստիկանությունը Բաղրամյան պողոտայից տարավ ալկոհոլ օգտագործած երեք երիտասարդի: Նրանք մի քանի ժամ շարունակ պողոտայում նստացույց անողների մոտ խմել են գարեջուր, վիճաբանել, հրաժարվել լքել տարածքը: Ոստիկանները ստիպված են եղել նրանց տարածքից հեռացնել ոստիկանական մեքենայով:
09.00
Ցուցարարները քննարկում են ստեղծված իրավիճակը և հնարավոր լուծումներ փնտրում: