Եթե գործարքի կարելի էլ է հասնել, ապա այժմ. Իրանի և «վեցյակի» ԱԳՆ ղեկավարներին 48 ժամ է մնացել
ԱշխարհԻրանը և «վեցյակը» (ՄԱԿ-ի Անվտանգության խորհրդի հինգ մշտական անդամները՝ գումարած Գերմանիան), որոնք Վիեննայում բանակցություններ են վարում Թեհրանի միջուկային դոսիեի շուրջը, ընդհուպ մոտեցել են պատմական համաձայնագրի կնքմանը, տեղեկացնում է «Արմենպրես»-ը: Կողմերն այնքան մոտ են գտնվում «ձեռք ձեռքի խփելու» համար, ինչպես երբեք բանակցային գործընթացի 11 տարվա ընթացքում, որը կոչված է մի կողմից միջազգային հանրակցության վերահսկողության տակ դնելու միջուկային ծրագիրը, իսկ մյուս կողմից՝ վերացնելու պատժամիջոցները, որոնք խեղդում են 80-միլիոնանոց երկրի տնտեսությունը:
Սակայն մի շարք հարցեր մինչև հիմա մնում են չլուծված: Եվ դրանք այնքան սուր են և զգայուն, որ կարող են գերեզման դնել բանակցային գործընթացը: Այս իրադրության մեջ դիրքորոշումներն ընդհանուր հայտարարի բերելու խնդիրն ընկած է արտաքին գործերի նախարարների վրա, որոնք հուլիսի 5-ին վերադարձել են Վիեննա: Հուլիսի 6-ին նրանք կանցկացնեն առաջին լիագումար նիստը կոնսուլտացիաների ներկայիս եզրափակիչ փուլն սկսվելու պահից ի վեր, որը մեկնարկել է հունիսի 27-ին: Նրանց հանդիպումը կարող է լինել բավականաչափ երկարատև, քանի որ համաձայնության հասնելու համար նախարարներն ունեն սոսկ 48 ժամ:
Հուլիսի 5-ին ԱՄՆ-ի պետքարտուղար Ջոն Քերին նախազգուշացրել է, որ բանակցությունները կարող են ընթանալ երկու ուղիով՝ ավարտվելով ինչպես հաջողությամբ, այնպես էլ ձախողմամբ: «Մենք երբեք այսքան մոտ չենք եղել (համաձայնագրի կնքմանը)»,- պատմել է Միացյալ Նահանգների դիվանագիտության ղեկավարը մամուլի համար հակիրճ հաղորդման մեջ:
Սակայն ձեռք բերված առաջընթացն, ընդգծել է Քերին, չի նշանակում, թե գործարքն արդեն գրպանում է: Նա նախազգուշացրել է, որ ԱՄՆ-ը ցանկացած գնով չի պայքարի գործարքի համար և պատրաստ է «մի կողմ քաշվելու» այն դեպքում, եթե Իրանի պատվիրակությունը համագործակցելու ցանկություն չունենա: Եթե գործարքը լավը չլինի, ապա այն բնավ չի լինի, նախազգուշացրել է ամերիկացի դիվանագետը, հաղորդել է ՏԱՍՍ-ը: