Ադրբեջանում երկու օրում ՃՊՏ-ի հետեւանքով 17 մարդ է զոհվել
ԱդրբեջանԱդրբեջանում վերջին երկու օրվա ընթացքում տեղի ունեցած երեք ճանապարհատրանսպորտային պատահարի հետեւանքով 17 մարդ է զոհվել
Ինչպես հաղորդում է «Արմենպրես»-ը' վկայակոչելով lent.az լրատվական կայքը, օգոստոսի 1-ին Բաքու-Գուբա մայրուղու Opel մարդատար ավտոմեքենան բախվել է բեռնատարին, իսկ այնուհետեւ հարվածել ճանապարհից դուրս կայանած Mercedes-ին:
Արդյունքում Opel ավտոմքենայում գտնվող բոլոր 5 ուղեւորները տեղում մահացել են: Նրանց դիակները ավտոմեքենայից դուրս են բերել Ադրբեջանի արտակարգ իրավիճակների նախարարության փրկարարները:
Նույն մայրուղում Գուբայի Բարլը գյուղի մոտ VAZ ավտոմեքենան կորցրել է ղեկավարումը եւ բախվել ծառին: Ավտոմեքենայի ուղեւորը տեղում մահացել է, իսկ վարորդը ծանր մարմնական վնասվածքներով տեղափոխվել է հիվանդանոց:
Ադրբեջանական «Քյափազ ԹՎ» հեռուստաալիքը հայտնել է, որ հուլիսի 31-ին Գյանջա-Սամուխ մայրուղու վրա ՎԱԶ 21-06 տեսակի ավտոմեքենան կորցրել է ղեկավարումը եւ կամրջից ընկել ձորը: Ավտոմեքենայում երեխաների հետ միասին 11 մարդ է եղել: Բոլոր ուղեւորները, այդ թվում երեխաները, զոհվել են:
Ճանապարհային ոստիկանությունը հետաքննություն է սկսել զոհվածների ինքնութունը եւ ՃՏՊ-ների պատճառը պարզելու համար: