«Ժողովուրդ». «Հայաստան» հանրախանութի սեփականատիրոջ կողմից ծեծված պահակն անհետացե՞լ է հիվանդանոցից
Հայկական Մամուլ«Ժողովուրդ»-ը երեկ գրել էր, որ «Հայաստան» հանրախանութի սեփականատեր Հայրապետ Հայրապետյանը կիրակի օրը ծեծել է հանրախանութի պահակին: Թերթը տեղեկացրել էր նաև, որ երեկոյան՝ ժամը 20:20-ի սահմաններում, պահակին տեղափոխել էին «Արմենիա» բժշկական կենտրոն: Երեկ այցելեցինք հիվանդանոց՝ ծեծվածի հետ զրուցելու, սակայն այնտեղ մեզ պատասխանեցին, որ նման հիվանդ չունեն: Թե ճանապարհի կեսին ինչպես է անհետացել պահակը, այդպես էլ անհասկանալի է մնում: Թերթի լավատեղյակ աղբյուրների փոխանցմամբ, երբ պահակին տեղափոխել են հիվանդանոց և փորձել նրանից անուն-ազգանուն ճշտել, վերջինս հրաժարվել է իր մասին տեղեկություն տրամադրել: Հիվանդանոցի գրանցամատյանում ընդամենը նշվել է, որ նա խմած և անգիտակից վիճակում է եղել: ՀՀ ոստիկանության հասարակայնության հետ կապերի և լրատվության վարչությունից տեղեկացրել են, որ իրենք ևս հիվանդանոցից որևէ ահազանգ չեն ստացել: Կրկին թերթի թղթակիցը այցելել է «Հայաստան» հանրախանութ, որտեղ աշխատակիցները ևս մեկ անգամ պնդել են, որ իրենց պահակին Հայրապետյանի ծեծելուց հետո շտապօգնության մեքենայով տեղափոխել են հիվանդանոց:
«Սենք դեռ հետամուտ կլինենք այս պատմությանը»,- գրում է թերթը: