«Ազգային պատկերասրահ» միջազգային երաժշտական 8-րդ փառատոնը

2012-04-27 19:14:17

«Արվեստների պատկերասրահ» մշակութային հիմնադրամը ՀՀ մշակույթի նախարարության աջակցությամբ և Հայաստանի առաջատար բջջային օպերատոր «ՎիվաՍել-ՄՏՍ» ընկերության գլխավոր հովանավորությամբ ապրիլի 28-ից մայիսի 26-ը ներկայացնում է «Ազգային Պատկերասրահ» միջազգային երաժշտական ութերորդ փառատոնը:

ՀՀ մշակույթի նախարարությունում ապրիլի 27-ին, ժ.12.00-ին, փառատոնի մեկնարկի առթիվ անցկացվում է մամուլի ասուլիս, որին մասնակցում են փառատոնի գեղարվեստական խորհրդի նախագահ, կոմպոզիտոր, ԽՍՀՄ ժողովրդական արտիստ Էդվարդ Միրզոյանը, ՀՀ մշակույթի նախարարի տեղակալ Արթուր Պողոսյանը, «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը, ՀՀ վաստակավոր արտիստ, թավջութակահար, դիրիժոր Արամ Թալալյանը, փառատոնի հիմնադիրներ, «Արվեստների Պատկերասրահ» մշակութային հիմնադրամի նախագահ Մարիամ Շահինյանը, հիմնադրամի տնօրեն Գարիկ Նազարյանը:

«Ազգային պատկերասրահ» միջազգային երաժշտական ութերորդ փառատոնի հանդիսավոր բացումը «Վիվա Իտալիա» համերգային ծրագրով տեղի կունենա ապրիլի 28-ին՝ ժ. 19.00-ին, Երևանի Կոմիտասի անվան կամերային երաժշտության տանը:

Ծրագրին մասնակցում են երիտասարդ տաղանդաշատ երգիչներ Մերի Մովսիսյանը (սոպրանո), Ռիմա Խաչատրյանը (մեցցո-սոպրանո), Արշակ Կուզիկյանը (բարիտոն),փառատոնային նվագախումբը՝ Արամ Թալալյանի ղեկավարությամբ:

Փառատոնը այս տարի կհյուրընկալվի Կոմիտասի անվան կամերային երաժշտության տանը, քանզի Հայաստանի ազգային պատկերասրահի որմնանկարների սրահում, որտեղ ավանդաբար, անցկացվում է «Ազգային պատկերասրահ» միջազգային երաժշտական փառատոնը, Երևանը՝ 2012 թ. գրքի համաշխարհային մայրաքաղաքի հռչակման առթիվ բացվել է «Գրի հավերժություն» խորագրով իր տեսակի մեջ բացառիկ ցուցահանդեսը:

«Ազգային պատկերասրահ» միջազգային երաժշտական ութերորդ փառատոնը կներկայանա 6 համերգից բաղկացած համերգաշարով, որի շրջանակում ելույթ կունենան աշխարհահռչակ դաշնակահար Բորիս Բերմանը (ԱՄՆ), «Ակլարդիոն» դուետը (Ռուսաստանի Դաշնություն)՝ Եվգենի Վարավկոն (կլարնետ) և Մարիա Վլասովան (ակորդեոն), ՀՀ վաստակավոր արտիստ, դաշնակահար Արմեն Բաբախանյանը, Թբիլիսիի ազգային օպերային թատրոնի մեներգիչների «Սուլիկո» համույթը (Վրաստան):

Փառատոնի հանդիսավոր փակման համերգը կրում է «Նվիրում Հենդելին» խորագիրը, որին կմասնակցեն երիտասարդ սերնդի ճանաչված երաժիշտներ Մանե Գալոյանը (սոպրանո), Հասմիկ Բաղդասարյանը (սոպրանո), Կարեն Հակոբյանը (կոնտրտենոր, ԱՄՆ), Ջուլիետա Վարդանյանը (կլավեսին), Արմեն Մայիլյանը (շեփոր), փառատոնային նվագախումբը (գեղարվեստական ղեկավար և դիրիժոր՝ Արամ Թալալյան):

«Ազգային պատկերասրահ» միջազգային երաժշտական ութերորդ փառատոնը անցկացվում է «ՎիվաՍել-ՄՏՍ» ընկերության ամենամյա և շարունակական (2006-ից) հովանավորության շնորհիվ:

2008 թ. Փառատոնն ընդգրկված է ՀՀ Մշակույթի նախարարության պետական աջակցության ծրագրերի ցանկում:

Դիտվել է 600 անգամ:
Լրահոս
2 Սեպ
Ողջ լրահոսը...>>
Ամենաշատ ընթերցվածը