«Հայկական ժամանակ». ՀՀԿ-ական թեկնածուն քեֆ-ուրախություն էր կազմակերպել

2012-05-01 07:30:44

Երեկ «ՀԺ»–ն տեղեկացել է, որ Երևանի Նոր Նորքի առաջին զանգվածում՝ Նանսենի փողոցի հարակից այգում, Հայաստանի Հանրապետական կուսակցությունը գառ է մորթել ու քեֆ-ուրախություն կազմակերպել տարածքի բնակիչների համար:

Այցելելով նշված վայր՝ թերթի թղթակիցը համոզվել է, որ այգում իսկապես սեղան է գցված: Միայն թե, հյուրասիրվողներ դեռևս չկային: «ՀԺ»–ի թղթակիցը գրում թ, որ ինչ-որ սպասողական վիճակ էր, իսկ ափսեներում դասավորված ուտելիքները ցելոֆանի տոպրակներում էին, որ չչորանան: Մի խումբ տարեց մարդիկ, որոնք հավաքված էին սեղանից որոշակի հեռավորության վրա, ասացին, որ եկել են հանրապետական թեկնածուի հետ հանդիպելու: Նրանցից ոչ ոք, սակայն, թեկնածուի անունն այդպես էլ չմտաբերեց: Հայտարարեցին, թե իրենց հրավիրել են հանդիպման և խնջույքի մասին ոչինչ չեն ասել: Իսկ ձայնագրիչի մոտ խոսել համաձայնեց հավաքվածներից միայն մի կին:

«Նոր պիտի իմանանք ով է դեպուտատի թեկնածուն: Հանդիպում է, էլի, հըլը տեսնենք՝ ով է: Ժամը 4-ին է գալու, հեսա կգա, հեստ կիջնեն բոլորը: Մենք իրեն ենք ընտրում, հըլը գա տեսնենք' մեր ուզա՞ծն է: Ուղղակի դեմքով գիտեմ, անունը չգիտեմ: Տեսնենք՝ ով՞ է, ի՞նչ է ասում, ի՞նչ է խոսում: Միայն մի բան ենք ուզում, որ աշխատատեղ լինի, մարդիկ աշխատեն»,- ասաց կենսաթոշակառու Խանում Հովհաննիսյանը:

Թերթը նշում է նաև, որ Նոր Նորքի առաջին զանգվածն ընդգրկված է թիվ 3 ընտրատարածքում, և այստեղ մեծամասնական ընտրակարգով առաջադրված պատգամավորության ՀՀԿ-ական թեկնածուն Արթուր Ստեփանյանն է:

Դիտվել է 1052 անգամ:
Լրահոս
25 Հոկ
Ողջ լրահոսը...>>
Ամենաշատ ընթերցվածը