Պետք է կանգնենք ոնց որ Հիտլերի դեմ՝ ոչ մի քայլ հետ. Հրանտ Բագրատյան

2012-05-01 22:39:10

Այսօր Թալինում տեղի ունեցած ՀԱԿ հանրահավաքում նախկին վարչապետ Հրանտ Բագրատյանը, անդրադարձ կատարելով երկրի տնտեսական վիճակին, նշեց, որ իրենք կոմունիզմ չեն քարոզում.

«Երկիրն ունի որոշակի ՀՆԱ, և մենք բոլորս բողոքում ենք, ասում ենք՝ վատ է, ցածր է, աշխատանք չկա և այլն, բայց ինչ–որ կա ոնց որ բաշխվում է 400 ընտանիքի, ինչը համախառն ներքին արդյունքի 70% է։ 44 ընտանիքի ձեռքում է դրա շուրջ 50%-ը»։

Անդրադառնալով երկրի բյուջեին՝ նա հիշեցրեց, որ բյուջեն ընդունվել է 2 մլրդ 800 մլն դոլլար՝ 5 տարի առաջ, մնացել է՝ 2 մլրդ 400 մլն։ «Բյուջեն պետք է լիներ 4-4,5 մլրդ, ընդ որում՝ լրացուցիչ 1,5 մլրդ-ը լիուլի բավարար էր, որ թոշակները եռապատկվեն՝ դառնալով 99.000, այժմյան 29.000–ի փոխարեն, իսկ նվազագույն աշխատավարձը դառնար 72 հազար դրամ», – հավելեց նա։

Բագրատյանը խոսեց նաև գյուղացիների վարկային խնդիրներից. «Վարկեր են տվել գյուղացիներին, մարդիկ չեն կարողանում վերադարձնել։ Երբ որ նախանցյալ տարի գյուղատնտեսությունը քիչ արտադրանք տվեց, դիմեցինք կառավարությանը, ասեցինք՝ ինչու է վատ, ասեցին՝ ճգնաժամ է։ Բա եթե ճգնաժամ է, գյուղացին ինչ մեղք ունի, տոկոսները զրոյացրեք»։

«Սա սիստեմ է, դուք բոլորդ պետք է աղքատ լինեք, ողորմելի լինեք, որ գնաք, ընկնեք ոտքերը, ասեք՝ տվեք մեզ այդ 5000 դրամ կաշառքը», – նշեց նա՝ այդ խնդրի լուծումը տեսնելով այդ համակարգը ջարդելու մեջ։

ՀԱԿ անդամը հայտնեց, որ իրենց թշնամին առաջին հերթին այս երևույթն է, այս տեսակը, ով ժողովրդին դնում է նման վիճակի մեջ։ «Այ ես զոռբան միշտ հաղթել է. 428 թվականին, երբ թագավորին զրկեցին իշխանությունից, 1045–ին, երբ Անին հանձնեցին. թուրք չի եղել էդ վախտ, թուրքը հեշտ պրոբլեմ է, թուրքը գալիս է վրատ, կրակում է, ստիպված պիտի կրակես, վախենաս–չվախենաս, բայց այս ներքին թշնամին է կարևորը, այս զոռբաները, այս գողերը: Պետք է կանգնենք ոնց որ Հիտլերի դեմ՝ ոչ մի քայլ հետ։ Էլ չի կարող երկիրը ներքև գնալ այս արժեքներով», – իր ելույթը եզրափակեց Բագրատյանը։

Դիտվել է 980 անգամ:

Լրահոս
25 Ապր
Ողջ լրահոսը...>>
Ամենաշատ ընթերցվածը