Էդվարդ Նալբանդյանը հանդիպել է ԵԱՀԿ անդամ պետությունների դեսպաններին
Դիվանագիտական առաքելություններԵԱՀԿ երևանյան գրասենյակի ղեկավարի նախաձեռնությամբ փետրվարի 1-ին ՀՀ արտաքին գործերի նախարար Էդվարդ Նալբանդյանը հանդիպում ունեցավ Հայաստանում հավատարմագրված ԵԱՀԿ անդամ պետությունների դեսպանների և ԵԱՀԿ երևանյան գրասենյակի ղեկավար Անդրեյ Սորոկինի հետ: Այս մասին տեղեկացնում են ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Հանդիպմանը քննարկվեցին 2015 թվականի դեկտեմբերին Բելգրադում կայացած ԵԱՀԿ նախարարական խորհրդի արդյունքները, 2016թ. ԵԱՀԿ-ում Գերմանիայի նախագահությանն առնչվող և ԵԱՀԿ մի շարք այլ օրակարգային հարցեր:
Էդվարդ Նալբանդյանն անդրադարձավ ղարաբաղյան հիմնախնդրի խաղաղ կարգավորման գործընթացին՝ նշելով ԵԱՀԿ Մինսկի խմբի համանախագահ երկրների ակտիվ դերակատարության կարևորությունը։ Անդրադարձ արվեց Բեռնում անցյալ տարեվերջին տեղի ունեցած Հայաստանի և Ադրբեջանի նախագահների հանդիպման արդյունքներին։
Նախարար Նալբանդյանը բարձր գնահատեց ԵԱՀԿ երևանյան գրասենյակի գործունեությունը և շնորհակալություն հայտնեց գրասենյակի ղեկավար Անդրեյ Սորոկինին բեղմնավոր գործունեության համար: