Քաոս՝ Երևանի փողոցներում
ՎերլուծականՁեզանից նրանք, ովքեր Երևան քաղաքում հաճախ են օգտվում հասարակական տրանսպորտից, նկատած կլինեն այն՝ արդեն մարազմի նմանվող վիճակը, որ տիրում է Երևանի փողոցներում մանավանդ երեկոյան ժամերին՝ կապված հասարակական տրանսպորտի խայտառակ վիճակի հետ:
Կարծում եմ՝ կհամաձայնեք, որ վաղուց արդեն հասունացել է պահը՝ ոլորտում լրջագույն բարեփոխումեր անելու համար: Ըստ համապատասխան հաղորդագրությունների՝ Երևանի քաղաքապետարանն առաջիկայում պատրաստվում է ստուգել, թե որքանով է լավ աշխատում Երևանի տրանսպորտը հատկապես երեկոյան ժամերին, երբ ուղևորների թիվը, համեմատած օրվա ցերեկային ժամերի հետ, գրեթե եռապատկվում է: Ինչպես հաղորդում են լրատվամիջոցները, ՃՈ հետ համատեղ՝ նախորդ շաբաթ հասարակական ավտոտրանսպորտային միջոցների շահագործման նկատմամբ իրականացված հսկողության արդյունքում կազմվել է 25 արձանագրություն:
Հանձնարարվել է վարչական շրջանների համապատասխան ծառայությունների հետ համատեղ շարունակել մշտադիտարկումները և հատկապես երեկոյան ժամերին և ոչ աշխատանքային օրերին հետևել երթուղիներում շարժակազմերի անհրաժեշտ քանակի ու քաղաքացիների պատշաճ սպասարկման ապահովմանը:
Այն, որ Երևանը, հատկապես վերջին տասնամյակներին, երբեք էլ աչքի չի ընկել հասարակական տրանսպորտի հարմարավետությամբ ու օպերատիվությամբ, նորություն չէ: Մեզ ինչ հիշում ենք, կանգնած ենք երթևեկում, մեկի գոգին նստած կամ մեկ ուրիշի հետ կիսելով մեկ անձի համար նախատեսված նստարանը: Բայց այս ամենում ամենածանրը տղամարդկանց վիճակն է, քանի որ հաճախ է պատահում, որ ելնելով ջենտլմենական պահելաձևի տարրական կանոններից՝ ստիպված ենք լինում մեր տեղը զիջել կանանց և աղջիկներին ու ամբողջ ճանապարհը կիսակքած անցնելով՝ հետագայում ենթարկվում ենք ռադիկուլիտով հիվանդանալու ռիսկին: Որքա՞ն կարելի է հանդուրժել այս խայտառակ վիճակը, մեկը կա՞, որ մեզ ասի… Իրավիճակը գոնե ինչ-որ կերպ մեղմելու հույսով քաղաքապետարանը մի քանի տարի առաջ արտերկրից ավտոբուսներ էր ներմուծել ու փորձում էր դրանց օգնությամբ գոնե ինչ-որ կերպ թեթևացնել ծանրաբեռնվածությունը. դա էլ չօգնեց:
Մեր խորին համոզմամբ՝ քանի դեռ բոլոր երթուղային տաքսիները կամ, ժողովրդի լեզվով ասած, մարշրուտկաներն ամբողջովին չեն փոխարինվել նորմալ մարդատար ավտոբուսներով, այս խնդիրն այդպես էլ չկարգավորված է մնալու: Հետաքրքիր է՝ աշխարհի էլ ո՞ր մայրաքաղաքում կարելի կլինի հանդիպել «մարշրուտկա» կոչվող երևույթին, այն երևույթին, երբ A կետից B կետ հասնելու համար մարդիկ ստիպված են լինում ռիսկի ենթարկել սեփական առողջությունն ու կյանքը:
Հուսանք, որ քաղաքապետարանի կողմից ձեռնարկված այս միջոցառումը կտա իր բարի պտուղներն, ու գոնե երեկոյան ժամերին հավելյալ փոխադրամիջոցներ կներդրվեն քաղաքում, ինչը, վստահաբար, եթե ոչ լիովին կլուծի, ապա գոնե էապես կթեթևացնի ուղևորափոխադրումների խնդիրը:
Դավիթ Բաբանով