Թուրքիայում շարունակվում է Հրանտ Դինքի գործով դատավարությունը
ԱՐԽԻՎԱպրիլի 19-ին Թուրքիայում շարունակվելու է «Ակոս» թերթի նախկին խմբագրապետ Հրանտ Դինքի սպանության գործով միացյալ դատավարությունը:
Ինչպես հաղորդում է «Արմենպրես»-ը՝ վկայակոչելով թուրքական DemokratHaber լրատվական կայքը, Հրանտ Դինքի ընտանիքի փաստաբաններին հաջողվել է հասնել այն բանին, որպեսզի միացվեն նրա սպանության գործով հետախուզության նախկին բարձրաստիճան անձանց, սպանությունը կատարած Օգյուն Սամասթի և անմիջական կազմակերպիչ Յասին Հայալի դատական գործերը:
Դատական գործը լսվելու է Ստամբուլի 14-րդ ծանր հանցագործությունների դատարանում: Մեղադրական աթոռին կնստեն 8 բանտարկված և 24 կասկածյալ անձինք: Երեքշաբթի 19-ին սկսվող դատավարությունը կտևի 3 օր:
Կայքը հայտնում է, որ մերժվել է Հրանտ Դինքի սպանության ժամանակաշրջանում Ստամբուլի նահանգապետ եղած Թուրքիայի ներքին գործերի նախկին նախարար Մուամար Գյուլերի հետ կապված հետաքննություն սկսելու թույլտվության պահանջով Ստամբուլի հանրապետական դատախազության կողմից ՆԳ նախարարություն ուղարկված դիմումը:
Ըստ կայքի՝ Մուամար Գյուլերի նկատմամբ հետաքննություն սկսելու թույլտվության ստանալու համար Վճռաբեկ հանրապետական դատախազությունը դիմել է Պետական խորհուրդ:
Ստամբուլի «Ակոս» թերթի հայազգի խմբագրապետ Հրանտ Դինքը սպանվել է 2007 թվականի հունվարի 19-ին՝ խմբագրության առջև կատարված զինված հարձակման հետևանքով:
2012 թվականի հունվարի 17-ին դատարանի որոշմամբ Դինքի սպանության կազմակերպիչ Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը՝ 22 տարվա ազատազրկման:
2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում էր կայացրել Հրանտ Դինքի սպանության գործով դատավարությունն սկսել զրոյից:
Այս անգամ բոլոր ամբաստանյալներին պետք է առաջադրվեր «հանցավոր խմբավորման ստեղծման և կառավարման կամ դրանում մասնակցություն ունենալու» մեղադրանք: Բացի այդ, որոշումներ էին ընդունվել Դինքի սպանության ժամանակ բարձր պաշտոններ զբաղեցրած 9 անձանց, այդ թվում' Ստամբուլի նախկին ոստիկանապետ Ջելալեթին Ջերահի նկատմամբ դատական գործեր հարուցելու կապակցությամբ: