Ավտոբուսի պայթյունից տուժած հղի կինն իմացել է, որ տղա է լույս աշխարհ բերելու
ԱՐԽԻՎԵրևանի Հալաբյան փողոցում ապրիլի 25- երեկոյան ավտոբուսի պայթյունից տուժած հղի կինը' 37-ամյա Անուշ Եղիկյանը, իմացել է, որ տղա է լույս աշխարհ բերելու: Նրա կյանքին և պտղին վտանգ չի սպառնում, սակայն մասնագիտական հսկողությունը շարունակելու համար տեղափոխվել է Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ: Տեղափոխության ընթացքում նա հասցրել է շփվել հարազատների հետ, փոխանցել, որ առողջական վիճակը լավ է: Հարազատներն «Արմենպրես»-ին ասացին, որ նրա մոտ 15 շաբաթական հղիություն է:
Վերարտադրողական առողջության պերինատոլոգիայի, մանկաբարձության և գինեկոլոգիայի հանրապետական ինստիոտւտի տնօրեն Ռազմիկ Աբրահամյանը տեղեկացրեց, որ հղի կինը ծննդատուն է տեղափոխվել կրծքավանդակի հատվածում սալջարդերով: Ըստ նրա' դա անցողիկ է, այսօր գլխավորը հղի կնոջ մոտ վիժումը կանխելն է: «Սալջարդերը, արյունազեղումները դրանք երկրորդային են, այսօր գլխավոր հարցը հղիության պահպանումն է: Պտուղը չի տուժել, բայց լինում է, երբ սթրեսներից հետո բարդություններ են առաջանում: Նա կստանա համապատասխան բուժում, որն ուղղված է հղիությունը պահպանելուն: Դ ուրս գրման մասին դեռ վաղ է խոսելը, նա առայժմ մեզ մոտ կշարունակի բուժումը: Ամեն մի նորածին մեզ համար շատ թանկ է»,-ասաց Ռազմիկ Աբրահամյանը:
ՀՀ քննչական կոմիտեի ՀԿԳ քննության գլխավոր վարչության վարույթում քննվող քրեական գործով ՀՀ ԱԱԾ եւ ոստիկանության օպերատիվ հետախուզական մարմինների հետ համատեղ շարունակվում են իրականացվել ակտիվ և անհետաձգելի քննչական, օպերատիվ -հետախուզական միջոցառումներ՝ Հալաբյան փողոցում ապրիլի 25-ի ուշ երեկոյան թիվ 63 երթուղու ավտոբուսում տեղի ունեցած պայթյունի պատճառները, հանգամանքները պարզելու ուղղությամբ: Նախնական տվալներով՝ պայթյունի պահին ավտոբուսում գտնվել է 10 անձ՝ վարորդը և 9 ուղևոր, որոնցից 2-ը տեղում մահացել են, 7-ը՝ ստացել տարբեր աստիճանի մարմնական վնասվածքներ: