«Մեզ համար ամեն ինչ ոչ միայն կանխատեսելի էր, այլև՝ նույնիսկ թվերը համընկան»։ Խորհրդարանական ընտրությունների արդյունքների մասին այս կարծիքը հայտնեց «Նոր Ժամանակներ» կուսակցության նախագահ Արամ Կարապետյանը։ 

Նա ներկաների ուշադրությունը հրավիրեց այն փաստին, որ որևէ մեկը չի վիճում, որ ընտրությունները անց են կացվել կեղծիքներով, նույնիսկ՝ ՀՀԿ–ն։ «Քննարկումը գնում է այն հարցի շուրջ, թե ինչպես են արվել կեղծիքները», – նշեց նա։

Բանախոսի համոզմամբ, դա որևէ նշանկություն չունի։ «Մենք այն ընտրությունների ընթացքում չկարողացանք Հայաստանի իրական քաղաքական պատկերն ունենալ, այն՝ թե ինչքան մարդ է սատարում այս կամ այն քաղաքական ուժին», –  հիմնական խնդիրներից առաջինը մատնանշեց Կարապետյանը։

Նրա կարծիքով՝ քաղաքական ուժերի միջև գաղափարական պայքար չէր գնում, այլ՝ չափաբաժինների։

Երկորդ խնդիրը, որ մատնանշեց կուսակցության նախագահը այն է, որ հիմա հասկանալի չէ, թե ինչ ապագա ունի Հայաստանի տնտեսական և քաղաքական զարգացումը։