Առաջնագծում 12 000 մորուքավոր վահաբիստների ու ԻԼԻՊ-ի գրոհայինների կուտակումը չհերքվեց
Վերլուծական«Հայտնի է դարձել, որ ԼՂՀ-ի հետ շփման առաջնային գծի երկայնքով Բաքվի իշխանությունները կենտրոնացրել են բոլոր վահաբիստներին' ավելի քան 12 հազար մորուքավոր, ինչպես նաև վարչական Ադրբեջանի տարածքում ապրող բնիկ ժողովուրդներին»: Այս մասին երեկ հղում կատարելով գրող, հրապարակախոս Բակուր Կարապետյանի ֆեյսբուքյան էջին, տեղեկացրել է Nyut.am կայքը, ինչպես նաև, վերջինիս հիշատակմամբ, մի շարք լրատվական կայքեր:
Պակաս ուշագրավ չէ նաև նույն տեղում Բակուր Կարապետյանի գրառման շարունակությունը.
«Այս կերպ հանրապետության թուրքական իշխանությունները լուծում են բնիկ ժողովուրդների խնդիրը' ոչնչացնելով բնիկ ժողովուրդների' լեզգիների, թալիշների, ավարների, թաթերի, ցախուրների, թաբասարանների, ուդիների եւ այլոց գենոֆոնդը: Իսկ թուրքերը միայն հրամաններ են տալիս:
Նահանջողներին թիկունքում սպասում են հատուկ ջոկատները, որոնք կրակելու են նահանջողների վրա:
Հիմա Ադրբեջանի տարածքում ոչ մի մորուքավոր չես գտնի:
Ադրբեջանի իշխանությունները շփման գիծ են ուղարկել նաև Ռուսաստանում արգելված, Սիրիայից և Իրաքից վերադարձած' ԻԼԻՊ-ի գրոհայինների:
Ահա այսպես է Իլհամը պատերազմում Լեռնային Ղարաբաղի հայերի դեմ»:
Եթե այս տեղեկությունն իսկապես ճիշտ է, ապա թերևս բոլորս էլ հասկանում ենք, որ միայն վահաբիստների քանակին վերաբերող այդ թիվը' 12 000, բավական լուրջ է, խոսքը 1200-ի մասին չէ, ինչը հուշում է առաջիկայում Արցախի դեմ մեծամասշտաբ պատերազմ, առնվազն ապրիլի սկզբի ռազմական լայնածավալ գործողությունների նման գործողություններ սկսելու Ադրբեջանի մտադրության մասին: Այս անգամ, անշուշտ, նրանց զոհերի քանակն ավելի մեծ է լինելու, պարտությունն էլ ավելի խայտառակ և, ամենայն հավանականությամբ, կործանարար Ադրբեջանի համար որպես պետության:
Բակուր Կարապետյանը, որքան ճանաչում եմ նրան, լրագրության ասպարեզում նորեկ, անփորձ և արկածախնդիր մեկը չէ, առանց արժանահավատ տեղեկություններ ունենալու, չէր գրի նման բան: Այնուամենայնիվ, քանի որ նրա հետ հետ չհաջողվեց կապվել' տեղեկատվության հավաստիության առումով ինձ հետաքրքրողը պարզելու համար, դիմեցի ՀՀ ՊՆ մամուլի քարտուղար Արծրուն Հովհաննիսյանին: Վերջինս խորհուրդ տվեց այդ հարցով դիմել ԼՂՀ համապատասխան կառույցին: Այդպես էլ վարվեցի: Դիմելով ԼՂՀ Պաշտպանության բանակի մամուլի քարտուղար Սենոր Հասրաթյանին, հարցրեցի, թե Բակուր Կարապետյանի և հայաստանյան մի շարք լրատվական կայքերի երեկ հրապարակած այն տեղեկատվությունը, որ Ադրբեջանը շփման գծի երկայնքով կենտրոնացրել է մոտ 12 հազար վահաբիստների, ինչպես նաև ԻԼԻՊ-ի գրոհայինների և Ադրբեջանում ապրող բնիկ ժողովուրդների ներկայացուցիչների, համապատասխանո՞ւմ է իրականությանը, թե ոչ:
Վերոնշյալ հարցից հետո պարոն Հասրաթյանից սպասում էի հետևյալ չորս հակիրճ պատասխաններից մեկնումեկը' համապատասխանում է իրականությանը, չի համապատասխանում իրականությանը, ԼՂՀ Պաշտպանության բանակը չի տիրապետում ձեր նշած տեղեկատվությանը, կամ էլ' ես առայժմ չեմ տիրապետում նմանաբնույթ տեղեկատվության: Այս վերջինը կնշանակեր, որ, հնարավոր է, նման բան կա, հնարավոր է, որ չկա, զանգեք ավելի ուշ կամ վաղը, մինչ այդ փորձեմ ՊԲ հրամանատարությունից պարզել այդ հարցը, որպեսզի պատասխանեմ ձեզ: Սակայն ԼՂՀ Պաշտպանության բանակի մամուլի քարտուղարը, չգիտես ինչու բավական ջղային տոնով, հրաժարվեց պատասխանել վերոնշյալ հարցին' պատճառաբանությամբ, որ ինքը Բակուր Կարապետյանի և կայքերի գրածները չի մեկնաբանում, մեկնաբանություն ստանալու համար պետք է Բակուր Կարապետյանին զանգահարել:
Բացատրությունս, որ իրենից մեկնաբանություն չենք ակնկալում, այլ հրապարակված ու մեր թերևս ողջ ժողովրդին հետաքրքրող տեղեկատվության ճշտում, այսինքն' հաստատում կամ հերքում, ավելորդ էր, պարոն Հասրաթյանը մնաց անդրդվելի: Մինչդեռ ակնհայտ է, որ մեր ակնկալածը նրա մեկնաբանությունը չէր, հարցն այն մասին չէր, թե Բ. Կարապետյանն ինչո՞ւ է նման բան գրել, ի՞նչ հիմք է ունեցել դրա համար, կամ եթե դա ճիշտ է, ինչ ենք անելու, ինչ է լինելու հետո:
Տվյալ հարցին պատասխանելուց ԼՂՀ Պաշտպանության բանակի մամուլի քարտուղարի հրաժարվելու փաստից կարելի է տարբեր հետևություններ կատարել: Համենայն դեպս, կարծում եմ, եթե տվյալ տեղեկատվությունը չհամապատասխաներ իրականությանը, պարոն Հասրաթյանը հենց այդպես էլ կասեր: Ի դեպ, այն, որ ղարաբաղա-ադրբեջանական հակամարտ ուժերի շփման առաջնային գծի տարբեր ուղղություններում նկատվում են հակառակորդի զինուժի կուտակումներ ու ակտիվ տեղաշարժեր, մայիսի 2-ին պաշտոնապես հայտնել է նաև ԼՂՀ պաշտպանության նախարարությունը:
ՀՀ ՊՆ մամուլի քարտուղար Արծրուն Հովհաննիսյանն էլ, իր հերթին, նշել էր, որ քառօրյա պատերազմից հետո նման կուտակումներ չեն եղել: Ավելին. երեկվա ասուլիսում պատասխանելով այն հարցին, թե հետախուզությունն արդյոք տվյալներ ունի՞, թե ինչ քանակի զորքեր են մոտեցվել Ղարաբաղի սահմանին, և արդյոք սա նմա՞ն է մինչպատերազմական իրավիճակին, բառացիորեն ասել է հետևյալը.
«Իրավիճակը նախորդին նման չէ, բավականին ավելի մեծ զորախմբերի շարժի մասին է խոսքը, հետախուզությունն ամեն ինչ տեսնում, լսում է, եթե չլիներ, համապատասխան հայտարարություններ չէին լինի»:
Ստացվում է, որ թշնամին առաջիկայում պատրաստվում է ավելի մեծամասշտաբ ռազմական գործողությունների, քան ապրիլի սկզբին նախաձեռնածն է: Այլ հարց է, թե Ռուսաստանը կկարողանա՞ կանգնեցնել նրան, թե ոչ: Գուշակություններ անելն անշնորհակալ գործ է, բայց տպավորությունս այն է, որ Ադրբեջանը, այնուամենայնիվ, գնալու է իր համար բախտորոշ քայլի:
Արթուր Հովհաննիսյան