ԵԱՀԿ ՄԽ համանախագահ երկրներն ընդունել են Սերժ Սարգսյանի առաջարկներն ու թեզիսները. Շարմազանով
ՔաղաքականՎիեննայում ՀՀ նախագահ Սերժ Սարգսյանի ունեցած հանդիպումներից հետո ԵԱՀԿ Մինսկի խմբի համանախագահ երկրների արտաքին գործերի նախարարների տարածած հայտարարությունն իր մեջ ներառում է բոլոր այն թեզիսները, որոնց մասին խոսել է ՀՀ նախագահը:
Ազգային ժողովում լրագրողների հետ զրույցում այս մասին ասաց ՀՀ ԱԺ փոխնախագահ Էդուարդ Շարմազանովը՝ ամփոփելով Վիեննայում մայիսի 16-ին ՀՀ նախագահ Սերժ Սարգսյանի ունեցած հանդիպումները: «Ապրիլին Հայաստանի Հանրապետության նախագահը նշել է, որ 1994 թ. զինադադարը, որը վերահաստատվել է 1995 թ., պետք է լինի միակ փաստաթուղթը, որի վրա պետք է շարունակվեն բանակցությունները: Այսինքն, նոր զինադադարի պայմանագրի կնքումն անթույլատրելի է, որովհետև կա 1994 թ. կնքված զինադադար: Մինսկի խմբի համանախագահող երկրների արտգործնախարարներն իրենց հայտարարության մեջ հստակ ամրագրեցին. 1994 թ. զինադադարը գործում է ու միակ փաստաթութղն է: Իսկ այդ զինադադարով հստակ ամրագրված է Լեռնային Ղարաբաղի ստորագրությունը: Երբ արտգործնախարարները հայտարարում են, որ այդ զինադադարը գործում է, սդա նշանակում է, որ այն գործում է իր ողջ հետևանքներով: Այդ հայտարարության մեջ անուղղակիորեն նշվում է, որ Լեռնային Ղարաբաղը հակամարտության կողմ է, և առանց Լեռնային Ղարաբաղի այդ խնդիրը որևէ մեկը չի կարող լուծել: Եվ 1994 թ. զինադադարի ստորագրման տրամաբանությունը պետք է շարունակվի: Այլ տրամաբանություն, այլ փիլիսոփայություն, այլ սկզբունք չի կարող լինել»,- նշեց Շարմազանովը:
ԱԺ փոխնախագահի գնահատմամբ՝ Ադրբեջանը ձախողվել է, քանի որ նրա նպատակն էր առաջին հերթին չեղյալ հայտարարել 1994 թ. զինադադարը: «Կարող ենք ասել, որ ընդունվել է Հայաստանի Հանրապետության նախագահի առաջարկը, վերահաստատվեց, որ Լեռնային Ղարաբաղը հակամարտության կողմ է»,- նշեց Շարմազանովը:
Նա հավելեց, որ տարիներ շարունակ հայկական կողմը հստակ հայտարարել է, որ միայն կողմ է շփման գծում հետաքննության մեխանիզմների ներդրմանը: «Միակ կողմը, որը դեմ է հանդես եկել հետաքննության մեխանիզմների իրականացմանը, եղել է Ադրբեջանը: Մենք տեսանք, որ այստեղ ևս Ադրբեջանը իր նպատակին չհասավ, իսկ մեր Հանրապետության նախագահի առաջարկը, որ այս փուլում հետաքննության մեխանիզմների ներդրումն անհրաժեշտ է, ընդունվեց: Այն ընդունվել է երեք համանախագահ երկրների կողմից»,- ասաց Էդուարդ Շարմազանովը:
Համանախագահ երկրների արտգործնախարարներն իրենց հայտարարությամբ վերահաստատել են, որ հակամարտությունը պետք է կարգավորվի բացառապես խաղաղ ճանապարհով: «Այսինքն՝ Ադրբեջանի նպատակը՝ զինադադարը խախտել, նոր զինադադար պարտադրել, զիջումներ կորզել, կարգավորման նոր փաստաթուղթ առաջ բերել, Լեռնային Ղարաբաղին հանել բանակցային գործընթացից, չիրականացավ: Այս ամենը ցույց է տալիս, որ պաշտոնական Մոսկվան, պաշտոնական Վաշինգտոնը և պաշտոնական Փարիզը ընդունել են հայկական կողմի առաջարկները և ունեն նույն տեսլականը, ինչ պաշտոնական Երևանը: Կարող ենք ասել, որ Նախագահ Սարգսյանի առաջարկություններն ընդունվել են և ընդունվել են ոչ միայն բանավոր, այլ իրենց արտացոլումն են գտել արտգործնախարարների հայտարարության մեջ: Սա շատ կարևոր է: Բանակցությունների վերսկսման համար Հանրապետության նախագահն առաջ էր քաշել որոշ առաջարկներ և թեզիսներ, և Մինսկի խմբի համանախագահող երկրների արտաքին գործերի նախարարները ցույց տվեցին, որ համաձայն են պաշտոնական Երևանի հետ»,- ասաց ՀՀ ԱԺ փոխնախագահը:
Եզրափակելով խոսքը՝ Էդուարդ Շարմազանովը նկատեց, որ այս ամենն առաջին հերթին եղել է հայ զինվորի քաջության շնորհիվ: Նրա խոսքով՝ շփման գծում հայ զինվորների ձեռքբերումն ու հաջողությունը մայիսի 16-ին արտացոլվել է ԵԱՀԿ ՄԽ համանախագահող երկրների արտգործնախարարների հայտարարության մեջ: