Թուրքիայի նոր տնտեսական մոդելի հիմքում կդրվի պաշտպանական արդյունաբերությունը
ԹուրքիաԹուրքիայի նոր տնտեսական մոդելը հիմնվելու է արտադրության վրա, որտեղ առանցքային բաղադրիչը կդառնա պաշտպանական արդյունաբերությունը:
Այս մասին, ինչպես հաղորդում է «Արմենպրես»-ը, թուրքական TRT Haber հեռուստաալիքին տված հարցազրույցում հայտարարել է Թուրքիայի նախագահ Թայիփ Էրդողանի խորհրդական Յիղիթ Բուլութը:
Նա ասել է, որ թուրական կառավարությունը մտադիր է հետեւել ավելի վաղ ընտրած տնտեսական ռազմավարությանը, անկախ այն բանից, ով կհայտնվի նոր կառավարության տնտեսական ղեկավարման թիմում:
Խոսելով փախստականների եւ Թուրքիայի ու Եվրամիության միջեւ առանց վիզայի ռեժիմի մասին, Բուլութը նշել է, որ եթե Անկարայի հետ բանակցություններում Բրյուսելը շարունակի «երկակի ստանդարտների» իր քաղաքականությունը, թուրքական կառավարությունը կարող է դադարեցնել ԵՄ հետ իր բոլոր, այդ թվում' մաքսային միության վերաբերյալ պայմանավորվածությունները:
Եվրոպա անլեգալ փախստականների հոսքի դադարեցման եւ Շենգենյան գոտի թուրքական քաղաքացիներին առանց վիզայի մուտքի արտոնագիր հատկացնելու մասին համաձայնագրի քննարկման ժամանակ Բրյուսելի եւ Անկարայի միջեւ մի շարք տարակարծություններ են ծագել Թուրքիայի հակաահաբեկչական օրենքի առնչությամբ: ԵՄ-ը ցանկանում է, որպեսզի թուրքական այդ օրենքը բերվի ԵՄ չափանիշների հետ համապատասխանության, իսկ Անկարան խիստ դեմ է հանդես գալիս դրան: