Ռուսաստանի Քննչական կոմիտեն ուսումնասիրում է այն տեսանյութը, որում ՌԴ Ոստիկանության հատուկ նշանակության ստորաբաժանման (ОМОН) աշխատակիցը ոտքով հարվածում է հղի կնոջը` որովայնի հատվածում, մայիսի 6-ին` «Միլիոնների երթի» ժամանակ, հայտնում է BBC–ն։

Մոսկվայի գլխավոր քննչական վարչությունը միջոցներ է ձեռնարկում տվյալ աշխատակցի ինքնությունը պարզելու համար, հայտնել են ՌՔԿ լրատվական ծառայությունից։ Տեսանյութում ոստիկանության մի խումբ աշխատակիցներ քարշ են տալիս աղջկան գետնի վրայով, իսկ ОМОН–ի աշխատակիցներից մեկը ոտքով հարվածում է նրա որովայնին։ ՌՔԿ–ին, միջադեպն ուսումնասիրելու պահանջով, դիմել են Պետդումայի մի խումբ պատգամավորներ, որոնք ներկայացնում են ՌԴ Կոմունիստական կուսակցությունը։ Ոստիկանի գործողությունները դատապարտել են նաև Ռուսաստանի նախագահին կից մարդու իրավունքների հարցերով խորհրդի անդամները։