Աշխարհահռչակ օսկարակիր ռեժիսոր Ռոման Պոլանսկու հաջորդ ֆիլմը կդառնա «D» անվանումը կրող քաղաքական թրիլլերը` նվիրված Դրեյֆուսի գործին։ Ֆիլմի սցենարը գրելու է Ռոբերտ Հարրիսը, որն ավելի վաղ արդեն աշխատել է Պոլանսկու հետ «Ուրվականը» ֆիլմի նկարահանումների ժամանակ։ Կինոֆիլմի պրոդյուսերներն են լինելու ֆրանսիացիներ Ռոբեր Բենմուսսան և Ալեն Սարդը, որոնք հայտնի են օսկարակիր «Դաշնակահարը» ֆիլմում կատարած աշխատանքով։

Պոլանսկու խոսքերով` նա երկար ժամանակ է մտադիր է եղել ֆիլմ նկարել Դրեյֆուսի գործի վերաբերյալ` այն դարձնելով լրտեսական պատմություն։ «Այդկերպ կարելի է ցույց տալ թե ինչքան արդի է Դրեյֆուսի պատմությունը։ Դրա մեջ կա այն ամենը, ինչը մենք տեսնում ենք այսօր` «վհուկների որս», սեփական անվտանգության հանդեպ պարանոիդալ վախ, գաղտնի ռազմական դատարաններ, ամենակարող հետախուզական ծառայություններ, հանցագործությունները չբարձրաձայնող կառավարություն»,– հայտարարել է Պոլանսկին։

Մեծ էկրաններին ֆիլմի բարձրանալու ժամկետների վերաբերյալ դեռևս ոչ մի պաշտոնական տեղեկատվություն չկա, հայտնում է Lenta.ru–ն։

Նշենք, որ Դրեյֆուսի գործը դատական համակարգի համաշխարհային պատմության մեջ համարվում է ամենահայտնի գործերից մեկը, որի գլխավոր հերոսը` ֆրանսիական բանակի կապիտան Ալֆրեդ Դրեյֆուսը, 1894 թվականին դատապարտվել էր ցմահ ազատազրկման` Գերմանիայի կայսրության օգտին լրտեսելու և պետական դավաճանության մեղադրանքներով։ Սակայն, ֆրանսիական հասարակության զգալի մասը դեմ էր դատավճռին` պնդելով, որ գործը կարված է եղել ոմանց պատվերով։ Արդյունքում Դրեյֆուսի կողմնակիցներին հաջողվել է հասնել վերջինիս արդարացմանը։