Կան մարդիկ, որ պտուղը պտղաջրից չեն տարբերում. Արմեն Ռուստամյան
ՔաղաքականԱզգային ժողովում ընթանում է արտահերթ նստաշրջանի հերթական նիստը, որի ժամանակ քննարկվում է «Ընտրական օրենսգրքում փոփոխություններ և լրացումներ կատարելու մասին» օրենքի նախագիծը:
Ելույթով հանդես եկավ ԱԺ ՀՅԴ խմբակցության ղեկավար Արմեն Ռուստամյանը, ում մոտ քննարկումներից հետո տպավորություն է առաջացել, որ մեզ մոտ կան այնպիսի մարդիկ, որ ունեն բացառիկ տաղանդ՝ ամեն ինչ այնպես խճճելու, որ չհասկանանք՝ ինչ ենք ուզում անել:
«Ես ցանկանում եմ, որ մենք իսկապես հասկանանք, որ սա բերելու է նրան, որ մենք պտուղը պտղաջրի հետ թափենք: Ես հասկանում եմ, որ կան մարդիկ, ովքեր պտուղը պտղաջրից չեն տարբերում կամ կարող են գույներն այնքան խտացնել, որ դրանք խառնվեն միմյանց հետ, դառնան մի զանգված: Կան մարդիկ, որ այդ պտղաբերությանը չեն մասնակցել, իրենց ձեռք չի տալիս, որ այդ պտուղը լինի, որովհետև իրենց քաղաքական շահը ենթադրում է, որ ամեն ինչ պետք է վատը լինի: Կան այդպիսի մարդիկ, որ իրենց քաղաքական պլատֆորմը կառուցել են նրա վրա, որ ամեն ինչ պետք է վատ լինի, իսկ եթե մի լավ բան եղավ, դա կփլուզի իրենց ծրագրերը»,- ասաց Ռուստամյանը:
Արմեն Ռուստամյանի խոսքով՝ ԸՕ վերաբերյալ իշխանություն-ընդդիմություն քննարկումները աննախադեպ էին ու կարևոր. «Մենք լրջագույն հաջողությունը ցանկանում ենք ոտքի տակ տալ: Լավ, այսպես մինչև ո՞ւր ենք պատրաստվում գնալ: Իսկ ո՞վ է ասում, որ բոլոր լուծումները պետք է կատարյալ լինեն, որ բոլորը կանգնեն ողջունեն: Կատարյալ լուծումներ չեն լինում»,- ասաց Արմեն Ռուստամյանը:
Ինչ վերաբերում է ԸՕ փոփոխությունների համար պահանջվող ֆինանսական հարցերին՝ Ռուստամյանի խոսքով աշխարհում բոլոր այն կառույցները, որոնց մեջ Հայաստանը մտել է, մտել է նաև ինչ-որ ակնկալիքներով՝ այդ թվում նաև ֆինանսական, որոնցից կարելի է օգտվել: