Չինաստանը, Ճապոնիան և Հարավային Կորեան անթույլատրելի են համարում Հյուսիսային Կորեայի (ԿԺԴՀ) կողմից՝ իր պատմության ընթացքում թվով 3-րդ միջուկային փորձարկումների իրականացումը։ Այս մասին հայտարարել է Հարավային Կորեայի նախագահ Լի Մյոն Բակը, հայտնում է РИА Новости-ին։

«Մեր երեք երկրները համակարծիք են, որ Հյուսիսային Կորեայի կողմից միջուկային փորձարկումները և այլ հետագա սադրանքները անթույլատրելի են»,– հայտարարել է Հարավային Կորեայի նախագահը՝ Ճապոնիայի վարչապետ Յոսիհիկո Նոդայի և Չինաստանի կառավարության ղեկավար Վեն Ցզյաբաոյի հետ Պեկինում կայացած հանդիպման ավարտից հետո։

Ավելի վաղ որոշ հարավկորեական ԶԼՄ–ներ լուրեր էին տարածել, որ Փհենյանը պատրաստվում է հերթական ստորգետնյա միջուկային փորձարկումներն իրականացնել (ԿԺԴՀ–ն նմանատիպ փորձարկումներ իրականացրել է 2006 և 2009թթ.)։ Հիշեցնենք, որ ՄԱԿ Անվտանգության խորհուրդը մի շարք բանաձևեր է ընդունել, որոնք պահանջում են Հյուսիսային Կորեայից դադարեցնել միջուկային ոլորտում իրականացվող աշխատանքները՝ հակառակ դեպքում սպառնալով խիստ պատժամիջոցներ կիրառել վերջինիս նկատմամբ։