Թուրքիայի ազգային և կրոնական փոքրամասնություններին վտանգ է սպառնում. թուրքագետ
ԱշխարհԱկնհայտորեն երևում է, որ վտանգ է սպառնում Թուրքիայի ազգային և կրոնական փոքրամասնություններին: Այս մասին մամուլի սրահում հրավիրված ասուլիսին նշեց ՀՀ ԳԱԱ Արևելագիտության ինստիտուտի տնօրեն, թուրքագետ Ռուբեն Սաֆրաստյանը' ընդգծելով, որ այս օրերին Թուրքիայում փողոց է դուրս բերվել հասարակության մեծ զանգված, որի շարքերում կան շատ ծայրահեղականներ:
«Վտանգ սպառնում է, մասնավորապես, ալևիներին: Արդեն դեպքեր են եղել, երբ ամբոխը ներխուժել է ալևիների բնակավայրեր, թաղամասեր: Այսինքն' տեղի է ունենում այն, ինչը եղել է Թուրքիայի պատմության ընթացքում սկսած հայկական կոտորածներից»,-ասաց Ռուբեն Սաֆրաստյանը:
Թուրքագետը նշեց, որ Թուրքիայում ստեղծված իրավիճակում վտանգ կա նաև հայերի համար: Եվ վտանգ կա ոչ միայն տեղի հայերի համար, այլև մեր այն հայրենակիցների, ովքեր գտնվում են Թուրքիայում աշխատանքի նպատակով: Չի կարելի բացառել, որ նրանց նկատմամբ կարող են որոշ գործողություններ լինել:
Ինչ վերաբերում է տարածաշրջանի երկրների նկատմամբ Թուրքիայի արտաքին քաղաքականությանը, թուրքագետը նկատեց, որ հիմա այդ երկրում այնպիսի վիճակ է, որ ղեկավարությունը դրա մասին մտածելու ժամանակ և ցանկություն չունի:
«Երբ իրավիճակը հանդարտվի, իսկ հետևանքները դեռ երկար կմնան, ապա կարծում եմ, որ Թուրքիայի արտաքին քաղաքականությունը Հարավային Կովկասի ուղղությամբ առանձնապես փոփոխություններ չի կրի: Ակնհայտ է, որ Թուրքիայի համար առաջնային նշանակություն ունի Սիրիան»,-ասաց Ռուբեն Սաֆրաստյանը:
Թուրքիայում հուլիսի 15-ի ձախողված հեղաշրջման ժամանակ Թուրքիայի տարբեր քաղաքներում սկսված բախումների հետևանքով զոհվել է շուրջ 290 մարդ: Վիրավորների թիվը պաշտոնական տվյալներով 1440 է: Թուրքիայի արդարադատության նախարար Բեքիր Բոզդաղը հայտարարել է, որ երկրում «զտումները» շարունակվում են, ձերբակալված է շուրջ 6 հազար մարդ: Ակնկալվում է, որ այս թիվն առաջիկայում կավելանա:
Թուրքիայի իշխանությունները կատարվածի հետևում տեսնում են ԱՄՆ-ում ապաստանած չափավոր իսլամի քարոզիչ Ֆեթուլլահ Գյուլենին, ով 2014 թվականին «Մեծ կաշառքի» գործով տեղի ունեցած բացահայտումներից հետո դարձել է Էրդողանի հակառակորդը: