Գունդը գրավեցին ռոմանտիկները. առաջնորդ դարձավ Նիկոլ Փաշինյանը
ՎերլուծականՊՊԾ գնդի գրավումից հետո մի քանի կարևոր գործընթացներ են տեղի ունենում: Գործընթացին առաջին իսկ օրվանից ակտիվ մասնակցություն ունեցող, ԱԺ պատգամավոր, ընդդիմադիր Նիկոլ Փաշինյանը հայտնվել է դեպքերի զարգացման էպիկենտրոնում:
Նախ, հուլիսի 20-ի երեկոյան և գիշերը տեղի ունեցող իրադարձությունների ժամանակ Նիկոլ Փաշինյանը կանխեց արյունահեղությունը, համենայն դեպս դրա մասին արձանագրում էր ամբողջ համացանցը, և հատկապես պրոիշխանական հայտնի և ոչ հայտնի դեմքերը:
Այս ֆոնին սկսեցին սպառնալ Նիկոլ Փաշինյանին, ընդհուպ մինչև հայտարարություն եղավ, որ Նիկոլ Փաշինյանին սպանելու են: Սա լարեց բոլորի ուշադրությունը, և տեղի ունեցող իրադարձություններից առաջին շեղումն արձանագրվեց:
Հաջորդ օրը Փաշինյանը չգնաց Խորենացի փողոց: Տեղի ունեցավ փոփոխություն: Անկախ և ընդդիմադիր Փաշինյանին փոխարինելու եկավ Ռոբերտ Քոչարյանի արտգործնախարար Օսկանյանը:
Մեկ օր բացակայությունից հետո, Փաշինյանը հայտարարեց, որ ինքը բազմաթիվ նամակներ ու կոչեր է ստացել և հուլիսի 22-ին կլինի Խորենացի փողոցում, որտեղ և ելույթ կունենա:
Նիկոլ Փաշինյանն ամբիոն բարձրացավ այն օրը, երբ 5-օրյա լռությունը խախտեց երկրի նախագահ Սերժ Սարգսյանը: Ի դեպ, հուլիսի 22-ին լռությունը խախտեցին գրեթե բոլորը, բացառությամբ՝ Ռոբերտ Քոչարյանի: Սերժ Սարգսյանի ելույթին հաջորդեց Լևոն Տեր-Պետրոսյանի ելույթը, հետո ՀՅԴ-ն հանդես եկավ հայտարարությամբ, վերջում էլ՝ Արթուր Բաղդասարյանը:
Նիկոլ Փաշինյանը, որին հարգում և ընդունում են բոլոր կողմերը, հանդես եկավ ելույթով: Նիկոլ Փաշինյանի այսօրվա ելույթը հաճելի էր բոլորի համար: «Երկրում վիճակը ծայրահեղ վատ է, և Սերժ Սարգսյանը պետք է հրաժարական տա»: Ոճը նույնն է: Այս ոճի ելույթն ընդունվեց մեծ ցնծությամբ, և հավաքվածները մոռացան թե՛ Պավլիկ Մանուկյանին, թե՛ Ժիրայր Սեֆիլյանին, թե՛ մնացած բոլոր մասնակիցներին: Մարդիկ գոռում էին՝ Նիկո’լ, Նիկո’լ:
Պետք է արձանագրել, որ Նիկոլ Փաշինյանն այսօր դարձավ ընդդիմության առաջնորդ՝ մի կողմ թողնելով թե՛ Ժիրայր Սեֆիլյանին, թե՛ ՊՊԾ գունդը գրաված զինյալներին: Փաշինյանը կարողացավ ճիշտ պահին և ճիշտ քայլերով շահել հանրության համակրանքն ու դառնալ նոր կերտվող ընդդիմության առաջնորդը:
Հաջորդող օրերին, երբ ԱԱԾ-ն ու Ոստիկանությունը կչեզոքացնեն գունդը գրավողներին, նրանց կձերբակալեն և կկալանավորեն, Փաշինյանն ակտիվությամբ կպահանջի ազատ արձակել քաղբանտարկյալներին, դրա համար էլի ցույցեր, էլի ելույթներ, մինչև ընտրություններ:
Այս ամենը շատ ձեռնտու է երկրի գործող իշխանություններին, քանի որ Նիկոլ Փաշինյանն ավելի հարմար է որպես ընդդիմության լիդեր, քան ցանկացած այլ մեկը: Եվ կարևոր դետալ է նաև այն, որ հասարակությունը՝ ոգեշնչված Փաշինյանով, մոռացավ «Պավլիկյան շարժումն» ու դարձավ նոր ուրվագծվող իրադարձության մասնակից: