Բժիշկները զինված խմբից պահանջում են ազատ արձակել իրենց գործընկերներին
ԱՐԽԻՎՀանրապետության տարբեր հիվանդանոցների բժիշկներ պահանջում են ՊՊԾ գունդը գրաված զինված խմբից ազատ արձակել պատանդ բուժաշխատողներին: Հուլիսի 28-ին մի շարք բուժաշխատողների մասնակցությամբ տեղի ունեցած քննարկման ընթացքում պատանդառված բժիշկների գործընկերներն իրենց մտահոգությունը հայտնեցին ստեղծված իրավիճակի առնչությամբ:
« Ցավալի է, որ մեր գործընկերները գտնվում են պատանդի կարգավիճակում: Կոչ եմ անում զինված խմբին, որպեսզի հնարավորություն տան բժիշկներին այնտեղից դուրս գալ, որովհետև անկախ ամեն ինչից, բժիշկները եղել են իրենց կոչմանը հավատարիմ և օգնություն են ցուցաբերել բոլորին: Կարծում եմ, այս օրերին ընթացքում մեր աշխատանքով դա ապացուցել ենք»,- ասաց «103» ծառայության բժշկուհի Հասմիկ Հայրապետյանը:
«103» ծառայության ավագ բժիշկ Մարինա Ալիխանովան նշեց, որ բուժքույր Մալինա Մարգարյանի հետ աշխատել է երկար տարիներ և ցավում է գործընկերոջ համար:
«Մալինա Մարգարյանը փրկել է բազմաթիվ մարդկային կյանքեր: Խնդրում եմ զինված խմբին բաց թողնել բոլորին, առավել ևս՝ Մալինա Մարգարյանին: Շատ ցավալի է, որ կինը արդեն երկու օր է գտնվում է անազատության մեջ»,- նշեց Ալիխանովան:
Թիվ 17 պոլիկլինիկայի կանանց կոնցուլտացիայի բաժնի վարիչը Շուշանիկ Գրիգորյանը իր հերթին ասաց, որ պատանդ վերցրած գործընկերները իմացել են՝ ուր են գնում, սակայն դա նրանց չի խանգարել հետ կանգնել իրենց որոշումից:
«Բժիշկի մասնագիտությունը պարտավորեցնում, որպեսզի նա առանց վարանելու օգնի մարդկանց: Զինված խմբին ուղղակի խնդրում եմ, մարդկայնորեն մոտենան և բաց թողնեն պատանդներին»,- նշեց Գրիգորյանը: