Մայքլ Բլումբերգը նշանակվել է Առողջապահության համաշխարհային կազմակերպության բարի կամքի դեսպան
ՀասարակությունՁեռնարկատեր եւ ֆիլանտրոպ, Նյու Յորքի նախկին քաղաքագլուխ Մայքլ Բլումբերգը Առողջապահության համաշխարհային կազմակերպության բարի կամքի դեսպան է նշանակվել ոչ ինֆեկցիոն հիվանդությունների գծով: Այդ մասին հայտնել են ԱՀԿ-ի ժնեւյան կենտրոնակայանում:
Ընդգծվում է, որ այդ կարգավիճակում Բլումբերգն «ազգային եւ տեղական քաղաքական ղեկավարների հետ աշխատելու է ամբողջ աշխարհում»՝ ուշադրությունը կենտրոնացնելով ոչ ինֆեկցիոն հիվանդությունների ու վնասվածքների հետ կապված խնդիրների վրա: Խոսքը վերաբերում է սրտի հիվանդություններին, ինսուլտին, քաղցկեղին, շաքարախտին եւ խրոնիկական շնչառական հիվանդություններին, որոնք վիրավորումների ու վնասվածքների հետ միասին տարեկան 43 մլն մարդու կյանք են խլում:
ԱՀԿ-ն հիշեցնում է, որ 16 մլն մարդիկ այդ հիվանդություններից ու վնասվածքներից մահանում են մինչեւ 70 տարեկան հասակում: Եվս 1,25 մլն մահ բաժին է ընկնում ավտովթարներին:
«Վաղաժամ մահը եւ ոչ ինֆեկցիոն հիվանդություններից հաշմանդամությունը կարող են զգալի չափով կանխվել ժամանակին ընդունված, ստուգված, արդյունավետ միջոցների շնորհիվ»,- արձանագրել են ԱՀԿ-ում, հաղորդել է ՏԱՍՍ-ը:
Լուսանկարը' AP