Թուրքիան Սիրիայում քրդական պետության ստեղծում թույլ չի տա. վարչապետ
ԱՐԽԻՎԹուրքիան Սիրիայի հյուսիսում քրդական պետության ստեղծում թույլ չի տա:
Այս մասին, ինչպես հաղորդում է «Անատոլու» լրատվական գործակալությունը, Անկարայում մամուլի ասուլիսում հայտարարել է Թուրքիայի վարչապետ Բինալի Յըլդըրըմը:
«Թուրքիայի դիրքորոշումն այդ հարցում առավելագույն չափով պարզ է: Մենք Սիրիայի հյուսիսում ոչ մի քրդական պետականության ստեղծում թույլ չենք տա: Դա հակասում է նաեւ իր' Սիրիայի շահերին, որին անհրաժեշտ է պահպանել տարածքային ամբողջականությունը: Սիրիական տարածքում առանձին պետական կազմավորումների ձեւավորում թույլ տալով, մենք միայն տասնյակ տարիներ կերկարաձգենք հակամարտությունը: Դա կբերի Սիրիայի ամբողջական փլուզմանը», -հայտարարել է Յըլդըրըմը:
Թուրքիան երկյուղում է Սիրիայի հյուսիսում քրդական պետական կազմավորման հնարավոր ստեղծումից: Ներկայում Սիրիայի հյուսիսային շրջաններում քրդերը ինքնավարություններ են հռչակել: Նրանց մնում է վերահսկել Թուրքիայի հետ Սիրիայի միջեւ 900 կմ-ի հասնող սահմանի 100 կմ մասը եւս, որից հետո Թուրքիան ամբողջությամբ կկտրվի Սիրիայից: Բացի այդ Անկարան զգուշանում է, որ Սիրիայում եւ Իրաքում քրդական ինքնավարությունների ստեղծումից հետո հերթը կհասնի նաեւ Թուրքիայի արեւելյան եւ հարավ-արեւելյան մասում քրդական ինքնավարության ստեղծմանը, ինչի համար Թուրքիայի 20 մլն-ի հասնող քրդական բնակչությունը պայքար է տանում 1980-ականներից սկսած: