Վրաստանում մտադիր են արագորեն պարզել՝ ով Է պատվիրել գազամուղի պայթեցումը
ԱշխարհՎրաստանի պաշտպանության նախարար Լեւան Իզորիան օգոստոսի 23-ին հայտարարել է, որ շուտով հայտնի կդառնա, թե ռուսական գազամուղի պայթեցման մեջ մեղադրվողներն ումից են ստացել առաջադրանք:
Վրաստանի պետանվտանգության ծառայությունը օգոստոսի 22-ին հայտնել է ահաբեկչական գործողություն կատարելու փորձի համար հինգ մարդու, ինչպես նաեւ պաշտոնեական լիազորությունները չարաշահելու համար պարեկային ոստիկանության մի աշխատակցի եւ հանցավոր խմբի մասին չտեղեկացնելու համար երկրի մի քաղաքացու ձերբակալման մասին:
Հետաքննության տվյալներով՝ խումբը պլանավորում էր պայթեցնել Ռուսաստանը եւ Հայաստանը կապող գազամուղի հատվածը: Պետանվտանգության ծառայության ներկայացուցիչը բրիֆինգի ժամանակ հայտարարել է, որ «կալանավորվածներից մեկը հաճախ էր մեկնում Ուկրաինա, սակայն առայժմ հայտնի չէ՝ արդյոք հանցավոր խումբը հայտնվել է այդ երկրից»:
Թբիլիսիի քաղաքային դատարանն օգոստոսի 22-ի երեկոյան բոլոր կալանավորվածների նկատմամբ խափանման միջոց է ընտրել կալանքը: Դատարանի հերթական նիստը կկայանա հոկտեմբերի 10-ին:«Երբ պետանվտանգության ծառայությունը հայտարարություն է անում այն մասին, որ լուրջ վտանգ է կանխվել, բնականաբար, ես լիակատար վստահություն ունեմ դրա նկատմամբ:
Ինչ վերաբերում է այն բանին, թե ինչ կապեր են եղել, եւ հանցախումբը որտեղից է առաջադրանքն ստացել, հասարակությունը կտեղեկացվի մոտ ապագայում»,-ասել է նախարարը լրագրողներին, հաղորդել է ՌԻԱ Նովոստին: