Արտագաղթը թափանցել է անվտանգության մարմիններ
ՎերլուծականՄեկ ամիս առաջ Հայաստանից ընտանիքով արտագաղթել է վարչապետ Հովիկ Աբրահմյանի անվտանգության ծառայության ղեկավար Արմեն Զատիկյանը:
Մամուլը գրում է, որ պատճառը ֆինանսական խնդիրներն են: Այն, որ Զատիկյանը վարչապետի մոտ այլևս չի աշխատում, հաստատված է նաև պաշտոնապես: Եթե ճիշտ է Զատիկյանի աշխատանքից ազատվելու և երկիրը լքելու այն պատճառը, որի մասին գրում է մամուլը, իրավիճակն ավելի քան տխուր է:
Ստացվում է` կարիքից դրդված, այս երկրի հեռանկարին, վաղվա օրվան այլևս չեն հավատում, անգամ մարդիկ, ովքեր ի պաշտոնե կոչված են ապահովվել Հայաստանի, նրա բարձրաստիճան պաշտոնյաների անվտանգությունը:
Եվ սա այն դեպքում, որ նրանց աշխատավարձերը համեմատաբար բարձր են և այս ծառայության աշխատակիցներն ունեն գրված և չգրված արտոնությունների որոշակի համակարգ:
Նման պարագայում, գործ ունենք ոչ թե սովորական արտագաղթի, այլ ուղղակիորեն պետության անվտանգության ռեսուրսի թուլացման հետ:
Խնդիրը ոչ թե անձերի, այլ վտանգավոր նախադեպերի մասին է:
Սարգիս Հակոբյան