Աղօթում ենք, որ Տէրը քաջարթուն միտք ու պայծառ հոգի պարգեւի Մեր սիրելի զաւակներին. Ամենայն Հայոց Կաթողիկոսի շնորհավորական ուղերձը Գիտելիքի օրվա առիթով
ՀասարակությունՆ.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ
ՇՆՈՐՀԱՒՈՐԱԿԱՆ ՈՒՂԵՐՁԸ
ԳԻՏԵԼԻՔԻ, ԳՐԻ ԵՒ ԴՊՐՈՒԹԵԱՆ ՕՐՈՒԱՅ ԱՌԻԹՈՎ
«Մայր Աթոռ Սուրբ Էջմիածնից Գիտելիքի, գրի եւ դպրութեան օրուայ առիթով Հայրապետական Մեր օրհնութիւնն ենք բերում դպրոցահասակ եւ ուսանող Մեր բոլոր զաւակներին, մանկավարժներին, դասախօսներին, կրթութեան բնագաւառի բոլոր պատասխանատուներին:
Օրուայ խորհուրդը արտայայտում է մեր ժողովրդի ձգտումն ու սէրը գիտութեան ու լուսաւորութեան հանդէպ, որը դարձել է գրաւականը ազգային մեր յարատեւութեան: Ուսումնական ամէն տարեմուտ մեր ժողովուրդը տօնում է բարի յոյսերով ու սպասումով, որ կրթական հաստատութիւններից սփռուող գիտութեան լոյսով պիտի ամրանան ու զօրանան հոգին ու միտքը մեր զաւակների: Կրթութիւնն ու իմացութիւնը Աստծուց տրուած բարիք են, որպէսզի մարդը ճանաչելով իր Արարչին ու աշխարհը՝ ապահով ու երջանիկ դարձնի իր կեանքի ընթացքը:
Աղօթում ենք, որ Տէրը քաջարթուն միտք ու պայծառ հոգի պարգեւի Մեր սիրելի զաւակներին եւ պահի հաստատուն աստուածային պատգամների շաւիղներում, ուժ ու եռանդ շնորհի մանկավարժ-դասախօսներին եւ կրթութեան գործի բոլոր նուիրեալներին՝ կրթելու եւ դաստիարակելու ազգի արժանաւոր ու շնորհաշատ զաւակներ:
Թող Տիրոջ օրհնութեամբ նոր ուսումնական տարին արգասաւոր լինի առատ վաստակով՝ յանուն մեր հայրենիքի զօրացման եւ մեր ժողովրդի առաջընթացի»: