Երկրագնդի բնակչության 92 տոկոսը աղտոտված օդ է շնչում. ԱՀԿ
ԱշխարհԱռողջապահության համաշխարհային կազմակերպությունը հրապարակել է այն հետազոտության արդյունքները, որի համաձայն մոլորակի տասը բնակչից ինն ապրում է խիստ աղտոտված օդով շրջաններում: ԱՀԿ-ն նախազգուշացնում է այդ բնագավառում տիրող «արտակարգ դրության» մասին:
«Օդի աղտոտումը շարունակում է սպառնալի չափերով ազդել տնտեսության վիճակի և մարդկանց կյանքի որակի վրա: Դա արտակարգ դրություն է առողջապահության համար»,- ասված Է ԱՀԿ-ի զեկույցում:
Կազմակերպությունը կազմել է աշխարհի հատուկ ինտերակտիվ քարտեզը, որը հիմնված է օդի մաքրության չափման տվյալների վրա: Օդում վնասակար մասնիկների պարունակությունը ԱՀԿ-ի նորմաներին չի համապատասխանում՝ ոչ միայն Չինաստանում և Հնդկաստանում, այլև Եվրոպայի շատ երկրներում, ինչպես նաև Ռուսաստանի եվրոպական մասում:
Մայիսին Առողջապահության համաշխարհային կազմակերպությունը եկել է այն եզրակացությանը, որ քաղաքներում օդի որակը վատանում է, ինչը մեծացնում է հիվանդությունների տարածման վտանգը: Կազմակերպության տվյալների համաձայն՝ երկրագնդի քաղաքացիների ավելի քան 80 տոկոսն ապրում է այնպիսի շրջաններում, որտեղ օդի աղտոտվածությունը գերազանցում է՝ ԱՀԿ-ի կողմից թույլատրելի համարվող առավելագույն մակարդակը, հաղորդել է ՏԱՍՍ-ը: