Արծվիկ Մինասյանը չհերքեց իր փոփոխության մասին տեղեկությունը
ԱՐԽԻՎՀՀ էկոնոմիկայի նախարարի պաշտոնակատար Արծվիկ Մինասյանն առայժմ չի ցանկանում անդրադառնալ այլ պաշտոնում իր նշանակվելու մասին լուրերին, սակայն չի էլ հերքում կամ հաստատում, որ եղել է նման առաջարկ: Մինասյանը նախ լրագրողներին հորդորում է սպասել, մինչև համապատասխան որոշումը կլինի, ապա հստակեցնում է, որ ցանկացած ոլորտում ինքը պատրաստ է աշխատել և ցանկացած հարց քննարկել: Իսկ, թե ինքն անձամբ արդեն համաձայնել է զբաղեցնել ՀՀ բնապահպանության նախարարի պաշտոնը, Ա. Մինասյանը կրկին լռում է:
ԱԺ-ում լրագրողների հետ զրույցում նախարարի պաշտոնակատարին կարծես դուր չեկավ հարցը և նա դժվարացավ պատասխանել հարցին՝ պատրա՞ստ է արդյոք զբաղեցնել ՀՀ բնապահպանության նախարարի պաշտոնը: «Ես կարծում եմ պատշաճ չէ այդ հարցին հիմա պատասխանելը, քանի դեռ չի ձևավորվել նոր կառավարությունը և չկան համապատասխան հրամանագրեր: Չափազանց բարձր եմ գնահատում ցանկացած նախարարի դիրքն ու տեղը: Գոնե այս պահին դժվարանում եմ պատասխանել: Կա գործող նախարարի պաշտոնակատար և քանի դեռ չկա այլ հրամանագիր, այդ հարցին թույլ տվեք չպատասխանել: Կգա ժամանակը, կխոսենք: Դա ես ձեզ խոստանում եմ»,- ասաց նա:
Հարցին՝ դուք համաձայնե՞լ եք արդեն այդ պաշտոնում նշանակվել՝ Ա. Մինասյանը խուսափեց պատասխանել: «Ես կարող եմ այս պահին միայն էկոնոմիկայի նախարարության մասին խոսել»,- ընդգծեց նա:
Իսկ առհասարակ՝ Ա. Մինասյանը վստահեցնում է, որ էկոնոմիկայի ոլորտում ինքն, համենայն դեպս, արել է ամեն ինչ, որպեսզի ոլորտում առկա խնդիրներն համեմատաբար մեղմվեն: Նրա խոսքով՝ կայուն զարգացման հիմնարար սկզնուքները՝ երեք առանցքային ուղղություններն են, որի շուրջ էլ ցանկացած նախարար պետք է աշխատի, իսկ ինքը շարունակում է այդպես աշխատել: «Աշխատանքում ցանկացած որոշում պետք է համապատասխանի երեք չափանիշների՝ տնտեսություն կամ տնտեսական արդունավետության, սոցիալական ապահովության և էկոլոգիական խնդիրների պատշաճ լուծում: Այսինքն՝ ես կարծում եմ, որ բնությունից վերցվածը պետք է վերադարձվի բնությանը, իսկ բնության շահագործումը պետք է լինի ողջամիտ, որպեսզի կարողանանք կայուն զարգացման հիմնարար սկզբունքներն առաջ տանել»,- հավելեց նա:
Հարցին՝ Ա. Մինասյանը կկարողանա լուծել նաև բնապահպանական ոլորտի խնդիրները, նախարարի պաշտոնակատարն ավելացրեց, որ իր համար ցանկացած ոլորտում առաջնայինը շարունակում է մնալ սահմանադրւթյունը և ընդգծեց, որ շրջակա միջավայրի պահպանությունն ու վերականգնումը, ինչպես նաև դրանց ողջամիտ օգտագործումը պետական և հանրային իշխանության հիմնական պարտավորությունն է, որը նաև գալիք սերունդների առջև պատասխանատվության զգացում է: «Սա է, որ պետք է առաջնորդի ու կառավարի ցանկացած ղեկավարի, ցանկացած նախարարի»,- ասաց նա:
Ինչ վերաբերում է նախարարության անվանափոխությանն, ապա Ա. Մինասյանը նշեց, որ ինքն այդ հարցի հետ կապված արդեն իր տեսակետն հայտնել է, և ավելացրեց, որ այն չի փոխվել: «Ինձ մտահոգում է այն, որ ցանկացած որոշում նաև առանձնակի ֆինանսական հետևանք է առաջացնում, իսկ մյուս կողմից՝ անվանումն ինքը պետք է բովանդակությունն արտահայտի: Ես մնում եմ այն տեսակետին, որ էկոնոմիկա անվանումը հայերենով կարող ենք տնտեսություն թարգմանել»,- ասաց նա:
Մինասյանը չհամաձայնեց, որ նախարարության անվանափոխությունը ձև է՝ առանց բովանդակության, և հավելեց, որ Էկոնոմիկայի մեջ մտնում է ամեն ինչ, ինչը կապած է մարդկանց պահանջմունքների հետ: «Բովանդակություն, ուղղվածություն անշուշտ կա: Էկոնոմիկայի մեջ մտնում է ամեն ինչ, այդ թվում՝ մարդկանց պահանջմունքները և ռեսուրսների սահմանափակվածության պայմաններում որոշումներ կայացնելու հնարավորությունները: Սա է ամբողջ էկոնոմիկան»,- ասաց նա:
Արմինե Եփրեմյան