Շիրակը նոր մարզպետ կունենա
ԱՐԽԻՎԱյն, որ Շիրակի դաշնակցական մարզպետի հետագա գործունեությունը հարվածի տակ է՝ քննարկվում է ՏԻՄ ընտրությունների ավարտից հետո, երբ Գյումրիում ՀՅԴ-ն պարտվեց, իսկ ՀՀԿ-ն չհավաքեց նախատեսված ձայները։
Զարմանալին այն է, որ ի սկզբանե դաշնակցական մարզպետը հայտարարել էր, որ ինքը պատասխանատու չէ հանրապետականի ձայների համար, իսկ ՀՅԴ-ի անցողիկ տոկոսն էլ երաշխավորել էր: Այս մասին փաստում են մեր աղբյուրները։
Ինչևէ՝ դաշնակցական մարզպետի գլխին սև ամպեր են կուտակվել, որը կարող է դառնալ նրա հեռացման պատճառը։
Եվ ամպերը կուտակվել են՝ ո՛չ միայն պարտված ընտրությունների պատճառով։
ԼՈւՐԵՐ.com-ի տեղեկություններով՝ որպես մարզպետ, Հովսեփյանը թույլ ղեկավար է, և մարզպետարանում բարձիթողի վիճակ է այս պահին։
Ուժային կառույցների ներկայացուցիչներ Աշոտ Գիզիրյանն ու Ֆելիքս Ցոլակյանը խիստ կարգ ու կանոն էին հաստատել կառույցի պատերից ներս, նաև բնականոն աշխատանքներ էին իրականացվում գյուղական համայնքերում. հարկերի հավաքագրում, բարեկարգում...
Նոր մարզպետի օրոք պատկերը փոխվել է։
Խնդիրներ կան նաև մարզպետարանի աշխատակիցների հետ։ Պաշտոնի գալով՝ դաշնակցական մարզպետը հեռացրեց նախորդի որոշ կադրերի, ովքեր աշխատել էին թե՛ Գիզիրյանի, թե՛ Ցոլակյանի հետ, և մարզպետարանում հարգված մասնագետներ էին համարվում։
Նրանց փոխարինեցին Հովսեփյանի մարդիկ։
Իսկ հեռացվածնեը նշանակվեցին այլ՝ ձևական աշխատանքների՝ մարզպետի կողմից խոստում ստանալով, որ առաջին իսկ հնարավորության դեպքում իրենք կանցնեն ավելի լուրջ պաշտոնի։
Առաջին իսկ հնարավորությունն այս դեպքում՝ մեկին թոշակի ուղարկելն է։
Ստացվում է՝ Հովսեփյանի վարած քաղաքականության պատճառով պարապուրդի են մատնվել պրոֆեսիոնալներ, որոնց լռեցնելու համար էլ արհեստական աշխատատեղեր են ստեղծվել՝ մարզի բյուջեի հաշվին։
Լուրն ամեն կերպ հերքվում է մարզպետարանի կողմից, լռում են նաև հեռացված աշխատակիցները...
Ամեն դեպքում, մեր տեղեկություններով՝ պարտված ընտրությունների համար պատժելու, մարզպետարանում կարգ ու կանոն հաստատելու և գյուղական համայնքների վիճակը բարելավելու համար էլ դաշնակցականները որոշել են մարզպետ փոխել։
Այս պահին շրջանառվում է երկու թեկնածուի անուն. նախկին պատգամավոր, ծնունդով արթիկցի Հակոբ Մաթիլյանի և գյուղվարչության պետ Մովսես Մանուկյանի: Վերջինս 16 տարվա մասնագիտական փորձ ունի։
Անի Սահակյան