Առնո Բաբաջանյանի մահվան տարելիցի առիթով Երևանում հնչում էին նրա ստեղծագործությունները
Գիտություն և ՄշակույթԱնվանի կոմպոզիտոր Առնո Բաբաջանյանի մահվան 33-րդ տարելիցի կապակցությամբ կոմպոզիտորի արձանի մոտ տեղի ունեցավ ծաղկեդրման արարողություն և հարգանքի տուրք մատուցվեց մեծ հային: «Առնո Բաբաջանյանն իր երաժշտության գույներով, հնչյուններով կարողանում է մեր կյանքը տոն դարձնել: Պատանեկությանս տարիներին նրա հետ մի քանի հարցազրույց եմ անցկացրել: Կոմպոզիտորի խոսքը նույնքան երգեցիկ էր, որքան երաժշտությունը: Նրա թողած ժառանգությունը մեր կյանքն ավելի պայծառ և լուսեղ է դարձնում: Սիրում եմ Բաբաջանյանի'Երևանին նվիրված երգերը և փորձելու եմ խրախուսել երիտասարդ կոմպոզիտորներին մեր քաղաքին, հայրենիքին, ժողովրդին երգեր ձոնել»- նշեց ՀՀ մշակույթի նախարար Արմեն Ամիրյանը:
ՀՀ կոմպոզիտորների միության նախագահ Արամ Սաթյանն ասաց, որ Բաբաջանյանը զարմանալի անձնավորություն էր: «Նա հիանալի ընկեր էր, մարդ, ով զգում էր ժամանակը, կարողանում էր ապրել ժամանակի խնդիրներով: Սիրված էր բոլորից, բազմաշնորհ և բազմաժանր կոմպոզիտոր էր: Ցավում եմ, որ երկար չապրեց»,-պատմեց Արամ Սաթյանը:
«Ցանկանում ենք հայ մեծանուն կոմպոզիտորի հիշատակը վառ պահել, հանրահռչակել նրա երաժշտական ժառանգությունը: Այսօր Բաբաջանյանի անվան համերգասրահում, տարբեր երաժշտական դպրոցներում հնչելու են նրա ստեղծագործությունները»,-ընդգծեց «Առնո Բաբաջանյան հիշատակի հիմնադրամի» նախագահ, ՀՀ մշակույթի վաստակավոր գործիչ Գագիկ Մանասյանը:
Նրա խոսքով' իրենք մտադիր են Առնո Բաբաջանյանի անվան դահլիճում կոմպոզիտորի թանգարան ստեղծել:
Միջոցառմանը ներկա էին անվանի արվեստագետներ, մտավորականներ, պետական ու հասարակական գործիչներ, կոմպոզիտորի արվեստի երկրպագուներ:
«Բախտ եմ ունեցել կատարել Առնո Բաբաջանյանի երգերը: «Ազգ փառապանծն» իմ այցետոմսը դարձավ Հայաստանում և երկրի սահմաններից դուրս հյուրախաղերի, համերգների ժամանակ: Նրա երգերը կատարել են Աննա Գերմանը, Միրեյ Մաթյեն, Մուսլիմ Մագոմաևը և այլ հայտնի երգիչներ: Երջանիկ եմ, որ հաղորդակցվել եմ նրա հետ, ով ինձ համար պաշտպան է եղել»,-նշեց ՀՀ ժողովրդական արտիստուհի Ռաիսա Մկրտչյանը:
Առնո Բաբաջանյանի ստեղծագործական հարուստ ժառանգությունը ներառում է երգեր, գործիքային երաժշտություն, սիմֆոնիկ երկեր։ Նա ստեղծագործել է տարբեր ժանրերում' դասական, փոփ, ջազ։ Բաբաջանյանի ստեղծագործական ոճը ձևավորվել է Արամ Խաչատրյանի և Սերգեյ Ռախմանինովի ազդեցությամբ։
Հանրահայտ են կոմպոզիտորի «Կամուրջներ», «Գուշակիր ցանկությունս», «Մի՛ շտապիր», «Վերադարձրու ինձ երաժշտությունը», «Սիրո տարի», «Մոսկվա գետը», «Երկրագնդի լավագույն քաղաքը», «Հարսանիք» և այլ էստրադային երգեր, որոնք կատարվել են ԽՍՀՄ-ում և արտասահմանում: «Առաջին սիրո երգը» դիտարկվում է որպես հարազատ Երևանի հիմն: Նրա գրչին են պատկանում սիրված «Էլեգիա»-ն, «Նոկտյուրն»-ը։ Գրել է երաժշտություն «Հասցեատիրոջ որոնումները», «Առաջին սիրո երգը», «Հարսնացուն հյուսիսից», «Երջանկության մեխանիկա» և այլ հայկական կինոնկարների համար:
1991 թվականին Մոսկվայում, 1966 թվականին Երևանում ստեղծվել են «Առնո Բաբաջանյան» հիմնադրամները:
{gallery}arno1{/gallery}