Շիրակի թեմում անցկացվեց հայերեն Աստվածաշնչի առաջին տպագրության 350-ամյակին նվիրված համաժողով
ՀասարակությունՀայերեն Աստվածաշնչի առաջին տպագրության 350-ամյակին նվիրված նոյեմբերի 11-ին Շիրակի թեմի սոցիալ-կրթական կենտրոնում անցկացվեց «Աստվածաշնչի դերը մեր կյանքում» խորագիրը կրող համաժողով՝ թեմի «Հայոց եկեղեցու պատմություն» առարկայի ուսուցիչների մասնակցությամբ: Բանախոսը Մայր Աթոռ Սուրբ Էջմիածնի քրիստոնեական դաստիարակության կենտրոնի փոխտնօրեն Վարանդ Քորդմոսեյանն էր: Համաժողովի շրջանակներում անդրադարձ կատարվեց մի շարք կարևոր և արդիական թեմաների, որոնք պետք է իմանա ցանկացած քրիստոնյա: Բանախոսը հատկապես կարևորեց Աստվածաշնչի ընթերցման ճիշտ «ուղիները». Աստվածաշնունչը պետք է կարդալ հավատով, հասկանալով, խոկալով ու աղոթքով ու դրա հետ մեկտեղ պետք է բացառել այսպես կոչված «կամայական» ընթերցումները:
Դպրոցական նստարանից երեխաների մեջ Աստվածաշնչի ընթերցաման նկատմամբ սեր առաջացնելու համար նախ պետք է հետաքրքրություն առաջացնել՝ ճիշտ ներկայացնել ու մեկնել Աստվածաշունչը, իսկ դա պետք է անեն ոչ միայն ծնողները, այլ նաև դպրոցում՝ առարկան դասավանդող ուսուցիչները՝ «Արմենպրես»-ին վստահեցրին համաժողովի մասնակիցները:
«Թյուր կարծիք կա այսօր թե երեխաները չեն ընթերցում Աստվածաշունչ՝ ընթերցում են ու հատկապես պետք է տեսնել թե փոքրերն ինչ խանդավառությամբ են ընթերցում հատկապես մանկական Աստվածաշունը: Հիմա արդեն փորձ է արվում դպրոցներում ավելի նկարազարդ ու ծաղկազարդ դասագիրք-տետրեր ներմուծել տարրական դասարաններում»,-նշեց Շիրակի մարզի Քրիստոնեական Դաստիարակության Կենտրոնի պատասխանատու Մարիամ Ջանոյանը:
Համաժողովի ընթացքում ուսուցիչները հնարավորություն ունեցան հստակեցնել Աստվածաշնչի մեկնության, կարևորության, հասարակական կյաքնում Սուրբ գրքի ունեցած դերի մասին իրենց հետաքրքրող հարցերը:
Համաժողովը կազմակերպել էր Շիրակի մարզի Քրիստոնեական Դաստիարակության Կենտրոնը:
Արմենուհի Մխոյան