Հայաստանի արտաքին քաղաքականության ձախողումն եմ համարում այն, որ արդեն հասել ենք նրան, որ նման հեղինակավոր միջոցառումներին չմասնակցելը ավելի ճիշտ է, քան մասնակցելը։ Այս կարծիքը ՆԱՏՕ–ի գագաթնաժողովին՝ Սերժ Սարգսյանի չմասնակցելու վերաբերյալ հայտնեց ԱԺ արտաքին հարաբերությունների մշտական հանձնաժողովի «Ժառանգություն» կուսակցության պատգամավոր Ստյոպա Սաֆարյանը։ 

Այս ամենը, ըստ Սաֆարյանի, պայմանավորված է «այն խայտառակ դիվանագիտությամբ, որ վարվում է և որի արդյունքում արդեն երկրորդ անգամ ՆԱՏՕ–ն գագաթնաժողովի մակարդակով ընդունում է մի փաստաթուղթ, որն անտեսում է Լեռնային Ղարաբաղի ինքնորոշման փաստը»։

«Հայկական դիվանագիտությունը չի կարողանում այս ամենի դեմն առնել, իսկ ավելի ստույգ՝ չի էլ կարողանա առնել, քանի որ Մադրիդյան սկզբունքները հենց Ադրբեջանի տարածքային ամբողջականությունը ճանաչելու մասին են։ Ես ինչպե՞ս կարող եմ ՆԱՏՕ–ից կամ որևէ մեկից նեղանամ, եթե ՀՀ–ն ինքը ոչ միայն չի ճանաչում Լեռնային Ղարաբաղի հանրապետությունը՝ տապալելով նաև ԱԺ–ում մեր օրինագիծը, այլև՝ Մադրիդյան սկզբունքներում ճանաչվում է որպես ելակետ Ադրբեջանի տարածքային ամբողջականությունը», – տարակուսանք հայտնեց նա։

Ըստ նրա՝ Հայաստանի արտաքին քաղաքականության պատասխանատուներն են մեղավոր, որ ստեղծվել է այս իրավիճակը, «որի արդյունքում Սերժ Սարգսյանը խռովածի կեցվածք է ընդունում, նստում է «տանը»»։

«Առնվազն պետք է գնալ և ասել, թե ինչ ես մտածում, ամբիոնը օգտագործել», – նշեց Սաֆարյանը՝ մտահոգություն հայտնելով, որ երկիրը դուրս է բոլոր առաջատար պրոցեսներից։