Հայաստանում լուրջ մտահոգություն է մարդու իրավունքների ոտնահարումը. Արսինե Խանջյան
ՔաղաքականՍեպտեմբերի 21-ին կանադահայ դերասանուհի Արսինե Խանջյանի նախաձեռնությամբ կազմակերպվեց «Արդարություն հանուն Հայաստանի» ստորագրահավաքը, որի նպատակն էր սփյուռքի ուշադրությունը հրավիրել Հայաստանի ներքաղաքական իրավիճակի վրա: Այսօր հրավիրված քննարկմանը դերասանուհին հայտարարեց, որ ստորագրահավաքին արդեն միացել են շուրջ 4.5 հազար սփյուռքահայեր, ովքեր իրենց մահոգություններն են հայտնում Հայաստանում առկա մի շարք խնդիրների վրա և Հայաստանի իշխանություններին կոչ են անում անմիջական քայեր ձեռնարկել իրավիճակը շտկելու ուղղությամբ:
«Սա առաջին հանրային ստորագրահավաքն է, որտեղ աշխարհասփյուռ հայությունն իր մտահոգությունն է հայտնում Հայաստանում առկա խնդիրների վերաբերյալ: Այս ստորագրրահավաքով հայկական Սփյուռքը պահանջում է Հայաստանում անհապաղ քայեր ձեռնարկել բոլոր խնդիրները լուծելու ուղղությամբ»,- Հայաստան-Սփյուռք համագործակցություն թեմայով հրավիրված քննարկմանը հայտարարեց դերասանուհին:
Նա շեշտեց, որ Հայաստանում առկա տնտեսական ու քաղաքական խնդիրների կողքին այսօր բավականին լուրջ մտահոգություն է նաև մարդու իրավունքների ոտնահարումը, և եթե այսօր իշխանությունները հայտարարում են, որ մենք ապրում ենք ժողովրդավար երկրում, ապա պետք է անհապաղ քայլեր ձեռնարկեն, որպեսզի մարդու իրավունքները հարգվեն Հայաստանում:
«Ժամանակն է, որպեսզի մենք օգտագործենք մեր ռեսուրսը և բարձրաձայնենք հայ ժողովրդի արդարության մասին: Մենք մատնանշել ենք մի շարք խնդիրներ և Հայաստանի իշխանություններին կոչ արել հստակ քայլեր ձեռնարկել՝ դրանք լուծելու ուղղությամբ: Հայաստանի իշխանությունները պետք է ևս մեկ անգամ վերանայեն այդ քայլերը, որպեսզի մենք ունենանք ավելի ժողովրդավար երկիր: Սփյուռքում մի քանի կազմակերպված խումբ արդեն աշխատում է այդ ուղղությամբ, ովքեր նպատակ ունեն դիտորդի կարգավիճակով մասնակցել հաջորդ խորհրդարանական ընտրություններին: Մենք ստանում ենք բազմաթիվ հայտեր, նրանց տրամադրում ենք անհրաժեշտ գիտելիքներ, կլինի նաև հստակ ձեռագիր, որը կհամակարգի նաև նրանց գործունությունը Հայաստանում: Մենք որոշել ենք կանգնել Հայաստանի քաղաքացու կողքին»,- ասաց Արսինե Խանջյանը: