Կարեն Կարապետյանի վարկանիշը փոփոխական է
ՔաղաքականԿարեն Կարապետյանը զբաղեցնում է ՀՀ վարչապետի պաշտոնը, որն ամենաբարձր քաղաքական պաշտոններից մեկն է, և, բնականաբար, նա չէր կարող անկուսակցական լինել: Խորհրդարանում այս մասին լրագրողների հետ զրույցում ասաց ՀՀԿ խմբակցության պատգամավոր Վահրամ Բաղդասարյանը՝ անդրադառնալով այն հայտարարություններին, թե ՀՀԿ-ի անդամակցումով վարչապետ Կարեն Կարապետյանի վարկանիշն ընկել է:
Վահրամ Բաղդասարյանի համոզմամբ՝ դժվար է ասել՝ Կարեն Կարապետյանի համար ավելի հեշտ կլիներ աշխատել անկուսակցական լինելո՞վ, թե՞ կուսակացկան դառնալով, սակայն իշխող Հանրապետականը մեծ հույսեր է կապում վարչապետի հետ և նրա իմիջը կրկին կարող է բարձրանալ, եթե ծրագրերը կյանքի կոչվեն:
«Պետք է իրար կողք դնենք իմիջի ինչ-որ չափով նվազումը և անմիջապես մասնակցությունը՝ քաղաքական գործընթացներին: Վերջ ի վերջո, վարչապետի պաշտոնը բարձր քաղաքական պաշտոն է և լրջագույնը: Ինձ թվում է՝ ստեղծված իրավիճակի մեջ մենք նոր փուլ ենք մտնում և ժամանակն է, որպեսզի բոլոր քաղաքական պաշտոնի կրողները, քաղաքական գործիչները որոշեն իրենց կուսակցական պատկանելիությունը: Սա իմ անձնական կարծիքն է, իսկ ինչ վերաբերում է Կարեն Կարապետյանի վարկանիշի խնդրին, ապա դա շատ արագ փոփոխվող հարց է: Երբ որ հանրությունը կտեսնի նրա կատարած աշխատանքի արդյունքը, իր գնահատականը կտա»,- ասաց պատգամավորը՝ հավելելով, որ վարչապետի վարկանիշի նվազումը, որի պայմանավորում են ՀՀԿ-ի անդամակցումով, ժամանակավոր բնույթ է կրում. «Այն շատ արագ կվերականգնվի»,- ասաց նա: