Հայտնի է կաշառք վերցնելու մեջ մեղադրվող դատավորի դատի օրը
ԻրավունքՇենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործով առաջին դատական նիստը նշանակված է: ԼՈՒՐԵՐ.com-ը տեղեկացավ, որ նիստը տեղի կունենա դեկտեմբերի 15-ին՝ Շենգավիթ վարչական շրջանի ընդհանուր իրավասության դատարանում:
Դատավորը Կարեն Մարդանյանն է, ով նախկինում աշխատել է ԼՂՀ ընդհանուր իրավասության առաջին ատյանի դատարանում՝ որպես դատավոր:
Իշխան Բարսեղյանին մեղադրանք է առաջադրվել այն բանի համար, որ նա, 1999 թվականից զբաղեցնելով Երևան քաղաքի Շենգավիթ վարչական շրջանի ընդհանուր իրավասության դատարանի դատավորի պաշտոնը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, Նորիկ Հ.-ի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:
Իսկ փաստաբան Էլզա Զաքարյանին մեղադրանք է առաջադրվել այն բանի համար, որ նա, կաշառք տվողի և կաշառք ստացողի միջև կաշառքի շուրջ համաձայնության գալուն և կայացած համաձայնության իրականացմանը նպաստելով' կատարել է կաշառքի միջնորդություն:
Ուշագրավ է, որ court.am կայքում, որտեղ նշվում են տարբեր վարչական շրջանների դատավորների անուններն ու տվյալները, Իշխան Բարսեղյանի անունը դեռ չի հանվել կայքից և նա մինչ այս պահը, ըստ կայքի, համարվում է Շենգավիթ վարչական շրջանի ընդհանուր իրավասության դատավոր: