«Ա՛յ ընկեր, ես չեմ դնում էսինչի կամ էնինչի դեմ, ես դնում եմ ընտրվելու համար».
Բլոգոսֆերա«Միասնություն» համազգային շարժման համակարգող խորհրդի անդամ Գևորգ Պետրոսյանը ֆեյսբուքյան իր էջում գրել է.
««ԱՊԵՐ, ԽԻ՞ ԵՍ ԴՆՈՒՄ ԷՍԻՆՉԻ ԴԵՄ»...
Ապշել կարելի է այն գավառամիտ ու անգրագետ մոտեցումից, երբ ասում են՝ «այսինչը դրել է այնինչի դեմ»: Հիմնականում այդ մտածողությունն իշխում է հենց իշխանական ճամբարում: Ինչ է նշանակում «դնել գործող պաշտոնյայի դեմ», կամ «այսինչը գիտի՞, որ իրա դեմ ես դնում»: Ողորմելի մտածողություն...
Ա՛յ ընկեր, ես չեմ դնում էսինչի կամ էնինչի դեմ, ես դնում եմ ընտրվելու համար: Ի՞նչ ա, արդեն ընտրատարածքնե՞րն էլ են սեփականաշնորհված: Կարո՞ղ ա ուրիշին պատկանող հողամասում ինքնակամ շինություն եմ կառուցոմ, որ իրա համաձայնությունը հայցեմ:
Ու այս ամենի մեջ հենց իշխանությունն է հիմնական մեղավորը: Ոմանց տալով անդարդ կյանքի անժամկետ լիազորագիր, նպաստել է նրանց մեջ այն համոզմունքի ձևավորմանն ու խորացմանը, որ Հայաստանը բաժանված է մի քանի հողատերերի միջև, որոնցից մեկն էլ իրենք են, ու հենց իրենք պետք է որոշեն այլոց մտքի ու վարքի կանոնները:
Նման ֆեոդալական մտածողությանն ամենալավ ապտակը կլինի ընտրազանգվածի ակտիվ մասնակցության շնորհիվ ընտրություններում այդ «թերհաս ֆեոդալների» խայտառակ պարտությունը, որպեսզի մեկընդմիշտ հիշեն, որ ոգևորությունից խայտառակություն կես քայլ է, իսկ նա, ով կարծում է, որ ինքն ունի ամեն ինչի իրավունք, իրականում ոչ մի իրավունք էլ չունի...»: