«Սասնա ծուռ» Արթուր Սողոմոնյանը տառապում է ֆուրոնկուլյոզ հիվանդությամբ. անհապաղ բուժօգնություն է անհրաժեշտ
Իրավունք«Հիմնադիր խորհրդարան»-ի մամուլի խոսնակ Սյուզան Սիմոնյանը ԼՈւՐԵՐ.com-ին տեղեկացրեց, որ «Նուբարաշեն» ՔԿՀ-ում գտնվող «Սասնա ծռեր» խմբավորման անդամ Արթուր Սողոմոնյանի առողջական վիճակը կտրուկ վատացել է:
Սողոմոնյանն արդեն մի քանի ամիս է՝ տառապում է ֆուրոնկուլյոզ հիվանդությամբ, որը մաշկային հիվանդություն է: Նրա դեմքի, գլխի և մարմնի տարբեր հատվածներում թարախային բշտիկներ են գոյացել:
Սյուզան Սիմոնյանը նշեց, որ դա բավականին ցավոտ հիվանդություն է. «Ողջ մարմնին՝ նույնիսկ աչքի մեջ, սպիտակ գնդիկներ կան: Այժմ այդ թարախաբշտերը սկսել են պայթել և թարախ ու արյուն է հոսում: Փաստաբանը բազմաթիվ դիմումներ է ուղարկել քրեակատարողական հիմնարկին, սակայն արդյունք չի տվել»:
Սյուզան Սիմոնյանն այս վերաբերմունքը համարում է միտումնավոր խոշտանգում:
«Ես գնացել եմ բակտերիոլոգիական լաբորատորիա, խոսել եմ բժիշկների հետ: Նրանք ասացին՝ ֆուրոնկուլյոզն այնպիսի հիվանդություն է և բուժում նշանակելուց առաջ պետք է կատարվի բակ անալիզ, այսինքն պետք է վերցնեն, հետազոտեն թարախն ու արյունը, տեսնեն՝ ինչ բակտերիա է, որպեսզի իմանան՝ ինչով բուժեն: Մինչդեռ այս մարդիկ միտումնավոր և խոշտանգելու համար՝ չեն անում այդ անալիզը և նշանակում են երկու անտիբիոտիկ, որը ոչ մի օգուտ չի տալիս: Բոլորը գիտեն՝ ինչ պայմաններ են «Նուբարաշեն» ՔԿՀ-ում: Վարակը կարող է տարածվել նաև մյուս բանտարկյալների շրջանում: Նրա անկողինը պետք է ամեն օր փոխվի, անընդհատ քսուկներ քսվեն, թրջոցներ դրվեն: Իհարկե, այս ամենը Նուբարաշենում հնարավոր չէ իրականացնել, բայց գոնե հնարավոր է անալիզ վերցնել, որպեսզի համապատասխան բուժում նշանակվի և այս ամենի դեմը առնվի»,- ասաց նա՝ ավելացնելով, որ Արթուր Սողոմոնյանը նաև ուժեղ գլխացավեր ունի:
Նշենք՝ հիվանդությունը Արթուր Սողոմոնյանի մոտ ի հայտ է եկել «Նուբարաշեն» քրեկատարողական հիմնարկ տեղափոխվելուց հետո:
Արթուր Սողոմոնյանը մեղադրվում է ՀՀ ՔՕ 218 հոդվածի 3-րդ մասի 1-ին կետով (պատանդ վերցնելը) և 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել):
Սոնա Հարությունյան