«Բանանց»-ը համալրել է կազմը սերբ ֆուտբոլիստով (տեսանյութ, լուսանկար)
ՍպորտԵրևանի «Բանանց»-ի շարքերն է համալրել սերբ հարձակվող Նենադ Ինյացը: Այս մասին տեղեկացնում է ակումբի կայքը:
31-ամյա ֆուտբոլիստն իր կարիերայի ընթացքում հանդես է եկել Սերբիայի, Ռուսաստանի, Սաուդյան Արաբիայի, Ղազախստանի և Հունաստանի առաջնություններում՝ հանդես գալով «Ամկար», «Վոլգա», «Ալ-Անսար», «Ատիրաու», «Էրգոտելիս» և այլ ակումբներում: Նրա վերջին ակումբն է եղել սերբական «Զեմուն»-ը:
Նենադ Ինյացը «Բանանց»-ին էր միացել Անթալիայում կայացած ուսումնամարզական հավաքի ժամանակ և գոլի հեղինակ էր դարձել Յուրմալայի «Սպարտակ»-ի դեմ ստուգողական խաղում.
«Ընկերներիցս հետաքրքրվեցի և իմացա, որ «Բանանց»-ում կան լավ պայմաններ, կա լավ թիմ, որը խաղացել է Եվրոպայի լիգայում: Հետո արդեն ինքս տեսա մարզաբազան և համոզվեցի, որ ամեն ինչ լավ է այստեղ: Փառք Աստծո, լավ ստացվեց և գոլ խփեցի «Բանանց»-ի կազմում իմ առաջին խաղում: Ինձ դուր եկավ թիմը և կարծում եմ, որ ամեն ինչ լավ կլինի: Գիտեմ, որ «Բանանց»-ի գործերը հիմա այնքան էլ լավ չեն մրցաշարային աղյուսակում, սակայն պետք է մարզվենք, խաղանք և պայքարենք՝ մեր առջև դրված խնդիրները լուծելու համար»,- «Բանանց»-ի պաշտոնական կայքի հետ զրույցում ասել է Նենադ Ինյացը: