Իտալիայի հյուսիսում տեղի ունեցած ավերիչ երկրաշարժի հետևանքով զոհվածների թիվը հասել է 15-ի, տուժել է ավելի քան 100 մարդ, ևս 6000-ը՝ տարհանվել իրենց տներից։ Այս մասին հայտնում է РИА Новости-ն՝ հղում կատարելով տեղական ԶԼՄ-ներին։

Իտալիայի Քաղպաշտպանության ծառայության տվյալներով՝ 5 մարդ էլ համարվում է անհետ կորած։ Tgcom24 հեռուստաալիքի փոխանցմամբ՝ երկրաշարժից հետո Իտալիայի Քաղպաշտպանության ծառայություն են դիմել մոտ 6000 մարդ՝ ժամանակավոր կացարաններ տրամադրելու խնդրանքով։ Հեռուստաալիքի տվյալներով՝ իրենց տներից տարհանված քաղաքացիների թիվը գերազանցել է 13 հազարը, քանի որ մայիսի 20-ին տեղի ունեցած ավերիչ երկրաշարժից հետո ժամանակավոր վրանային ճամբարներում հաստատվել էր շուրջ 7.5 հազար մարդ։

Հիշեցնենք, որ ինչպես ավելի վաղ հայտնել էր Լուրեր.com-ը, Իտալիայի Էմիլիա-Ռոմանյա նահանգում 5.8 մագնիտուդ ուժգնությամբ երկրաշարժի հետևանքով զոհվածների թիվը հասել էր 9-ի։