Հնարավոր չէ, որ «Երկիր ծիրանի»-ն համագործակցի իշխանության հետ (լուսանկարներ)

2017-03-16 17:20:03

Ինչպես արդեն տեղեկացրել ենք՝ երեկ հայտարարվեց քաղաքաական նոր պլատֆորմի՝ «Երկիր ծիրանի» կուսակցության ստեղծման մասին: Կուսակցության նախաձեռնող խմբի անդամները հիմնականում նոր դեմքեր են, ովքեր միավորվել են մեկ գաղափարի շուրջ: Նրանք ամենատարբեր մասնագիտությունների տեր մարդիկ են՝ իրավաբան, ինժեներ, քիմիկոս, պատմաբան:

ԼՈւՐԵՐ.com-ի թղթակիցը զրուցեց նորաստեղծ կուսակցության նախաձեռնող խմբի անդամ Սեդա Մելիքյանի հետ, ով նշեց, որ նոր կուսակցություն ստեղծել՝ իրենց ստիպել է այսօրվա քաղաքական վիճակը. «Այս պահին մեզ մոտ քաղաքական ճգնաժամ է: Մենք որոշեցինք համախմբել Հայաստանը, սփյուռքը, Արցախը, Արևմտյան Հայաստանը: Այստեղ մեր երեք պետությունների դրոշներն են կանգնած: Մենք որոշեցինք, որ հայ ազգը պետք է ունենա միասնական քաղաքական պլատֆորմ և մասնակցի իր ապագայի կերտմանը»: 

Հնարավո՞ր է գա մի շրջան և համագործակցեն իշխանության հետ, թե՞ լինելու են բացառապես ընդդիմադիրների հետ հարցին նա հարցով պատասխանեց. «Այսքանից հետո, ի՞նչ եք կարծում հնարավո՞ր է նման բան»:

Մենք զրուցեցինք նաև «Ժառանգություն» կուսակցության նախկին անդամ, այժմ «Երկիր ծիրանի» նոր պլատֆորմի նախաձեռնող խմբի անդամ Դավիթ Հակոբյանի հետ: Նա նշեց, որ այստեղ ինքնանպատակ ոչինչ չկա, և պահի հրամայականը, այսօրվա քաղաքական վիճակից այլ ելք գտնելու պահանջն է պատճառ հանդիսացել նոր պլատֆորմ հիմնադրելու: 

Նա բացառեց իշխանությունների հետ համագործակցելը. «Ես եղել եմ «Ժառանգություն» կուսակցության ամենաակտիվ ներկայացուցիչներից ու համակարգողներից և բացառեցի թեկուզ ոչ իշխանական, բայց իմ համոզմամբ՝ իշխանությունների հետ համագործակցած և այդ իշխանությունում բաժնետոմսեր ունեցող ներկայացուցիչների հետ համագործակցությունը, հետևաբար, ես բացառում եմ դա»:

Թե ով կղեկավարի կուսակցությունը, ինչ ձևաչափով կանցկացվի պայքարը, Հակոբյանը նշեց, որ այս պահին ոչինչ չի կարող ասել. «Ժամանակը ցույց կտա: Այսօր դեռ մեր համագումարն է և հետագա մեր անելիքները կլինեն թափանցիկ, բաց, ամեն բան կհայտարարենք»:

«Երկիր ծիրանի» կուսակցության անդամ Զարուհի Փոստանջյանը երեկ նշեց, որ իրենք հանդես են գալու միասնական և նոր գաղափարներով: Նա անդրադառնալով անվանմանը՝ բացատրեց. «Ինչո՞ւ «Երկիր ծիրանի», որովհետև մենք խնդիր ունեինք համախմբելու հայությանը և վերադառնալու մեր ակունքներին: Մեր երկրի անվանումը ծիրանի է, և այս ծառը ու նրա տված պտուղը նույնպես կատարյալ է, ինչպես մեր հայրենիքը: Ծիրանը միակ պտուղն է, որը բաժանվում է հավասարապես երկու մասի, ինչը նաև արդարության նշան է»:

Դիտվել է 850 անգամ:

Լրահոս
23 Ապր
Ողջ լրահոսը...>>
Ամենաշատ ընթերցվածը