Եվրոպական հետազոտական KOG ընկերություն. Քաղաքացիները երկրում ծավալվող փոփոխությունները կապում են «Ծառուկյան» դաշինքի հետ
ՔաղաքականԵվրոպական հետազոտական KOG (Institute for Marketing and Communication Sciences) և «Demokratijos projektai» ընկերությունը Հայաստանում անցկացրել է սոցիոլոգիական հարցումներ: Հարցման արդյունքները հրապարակվեցին այսօր:
Հրապարակված թվերը փաստում են, որ Հայաստանում խորհրդարանական ընտրություններին մասնակցող կուսակցությունների և դաշինքների մեջ առաջատարը Գագիկ Ծառուկյանն է՝ իր ղեկավարած «Ծառուկյան» դաշինքով: Այս դաշինքի հետ են քաղաքացիները կապում իրենց հույսը, երկրում ծավալվող փոփոխություններն ու դրական տեղաշարժերը:
Լրագրողների դիտարկմանը, որ վերը նշված սոցիոլոգիական հարցումների տվյալները տարբերվում են օրեր առաջ հրապարակված սոցիոլոգիական հետազոտությունների արդյունքներից, հարցման արդյունքներն ամփոփոխ քաղաքագետ Մինդաուգաս Լապինսկասը պատասխանեց. «Ես չեմ կարող «Գելափ» ընկերության ուսումնասիրության արդյունքների վերաբերյալ տեսակետ հայտնել, բայց շեշտում եմ մեկ բան, որն ընդունված պրակտիկա է սոցիոլոգիայում՝ տրվող հարցերի ձևակերպումներից կախված են նաև դրանց տրվող պատասխանները: Հետևաբար, ես չեմ կարող ասել, թե Ձեր նշած ընկերությունն ինչ հարց է տվել և ինչ պատասխան ստացել»:
Լրագրողներին հետաքրքրում էր նաև այն, թե ով է ֆինանսավորել իրենց ընկերությունները՝ Հայաստանում նման սոցիոլոգիական հարցում անցկացնելու համար: «Մենք կապված չենք ո՛չ Գագիկ Ծառուկյանի, ոչ՝ որևէ այլ կուսակցության հետ, նրանցից ֆինանսավորում չենք ստացել: Մեզ սոցիոլոգիական հարցումներ իրականացնելու համար ֆինանսավորել են մեր գործընկեր կազմակերպությունները»:
Աղավնի Սուքիասյան