Հայաստանը ծրագրում է ավելացնել Լիբանանում հայ խաղաղապահների թիվը
ՀայաստանՀայաստանը նախատեսում է ավելացնել հայ խաղաղապահների թվաքանակը Հարավային Լիբանանում: Մայիսի 31-ին լրագրողների հետ հանդիպմանն այս մասին ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ, ՀՀԿ խմբակցության պատգամավոր Կորյուն Նահապետյանը:
«Այո, նման մոտեցում և գաղափար կա, որ մենք Հարավային Լիբանանում ավելացնենք մեր խաղաղապահների թվաքանակը: Վերջերս առիթ եմ ունեցել Իտալիայի Սենատում մասնակցել Հայաստան-Իտալիա դիվանագիտական հարաբերությունների 25-ամյակին նվիրված միջոցառմանը, որի ընթացքում իտալացի գործընկերների հետ զրույց ունեցա Լիբանանում իտալական հրամանատարության ներքո հայ խաղաղապահ առաքելության մասին: Իտալական կողմը շատ բարձր է գնահատում Հարավային Լիբանանում մեր իրականացրած գործունեությունը: Այն պահին, երբ կառավարությունն Ազգային ժողովի քննարկմանը կներկա! յացնի համապատասխան փաստաթուղթ, մենք կտանք մեր քաղաքական գնահատականը»,- ասաց Նահապետյանը:
Ներկայացնելով իր քաղաքական գնահատականը՝ Կորյուն Նահապետյանն ընդգծեց, որ ողջունում է հայ խաղաղապահների թվաքանակի ավելացումը Լիբանանում իրականացվող առաքելության շրջանակներում, քանի որ այն բավականին արդյունավետ է ու նպատակային: «Դրանով իսկ մենք միջազգային հանրությանը ցույց ենք տալիս, որ Հայաստանը միջազգային անվտանգությունն ապահովող երկիր է, ինչը չափազանց կարևոր է: Հատկապես ՆԱՏՕ-ի տարբեր հարթակներում հնչում են շատ բարձր գնահատականներ Հայաստանի մասնակցութ! յան հետ կապված»,- հավելեց պատգամավորը:
Նա նշեց, որ հարցի վերաբերյալ հանգամանալից քննարկում կունենան նաև Ազգային ժողովի համապատասխան հանձնաժողովում: «Այսուհետ ռազմական, ռազմաքաղաքական ոլորտի խնդիրները, որոնք նախատեսված են այս կամ այն միջազգային համաձայնագրով, քննարկվելու են Ազգային ժողովի պաշտպանության և անվտանգության հարցերի մշտական հանձնաժողովում՝ որպես գլխադասային հանձնաժողով»,- եզրափակեց Կորյուն Նահապետյանը: