Մի՛ փնտրեք սև կատու մութ սենյակում, ՀՀԿ-ում արշալույսները խաղաղ են. Շարմազանով
ՔաղաքականՀՀԿ խոսնակ Էդուարդ Շարմազանովն այսօր ԳՄ նիստից հետո լրագրողների հետ հանդիպման ժամանակ պատասխանելով հարցին, թե արդյոք վարչապետի ու նախագահի միջև, իբր թե, առկա հակասությունների լուրերն այդքան լուրջ էին, որ նախագահը որոշեց անդրադառնալ դրանց, նշեց, որ նախագահն այդ հարցին պատասխանեց, քանի որ մամուլում բազմաթիվ էին այդ մասին անհեթեթ հրապարակումները:
«Եւ լրագրողների հարցին ի պատասխան պարոն նախագահը պատասխանեց և հստակ ներկայացրեց մեր դիրքորոշումը: Մենք այդ դիրքորոշմանն ավելացնելու բան չունենք: ՀՀԿ-ում արշալույսները խաղաղ են, մենք մեկ միասնական թիմ ենք, կուռ գաղափարական թիմ ենք, ունենք մեր գործունեության հստակ տեսլականն ու պատրաստակամ ենք թե օրենսդիրում, թե գործադիրում իրականացնել քայլեր, որի համար ապրիլի 2-ին հանրության մեծամասնությունը մեզ ձայն է տվել, մեզ հետ հույս է կապե;», - ընդգծեց Էդուարդ Շարմազանովը:
Դիտարկմանը, թե նախադեպը կա, որ Հովիկ Աբրահամյանը բավական սկանդալային կերպով դուրս եկավ ՀՀԿ-ից, ՀՀԿ խոսնակը պատասխանեց. «Զուգահեռներն անհաջող են, որովհետև իրադարձություններն են այլ: ՀՀԿ-ն շաբաթներ առաջ միաձայն նախագահի առաջարկով վարչապետի պաշտոնում առաջարկել է Կարեն Կարապետյանին, իսկ հաջորդ օրը նախագահը կուսակցության նախագահի առաջին տեղակալ, գործող վարչապետին վերանշանակել է այդ պաշտոնում»:
Նրա խոսքերով՝ այլևս նման անհեթեթ լուրերին մեկնաբանություն չի տալու. «Մի՛ փնտրեք սև կատու մութ սենյակում, մանավանդ, երբ այդ կատուն ոչ մութ սենյակում է, շատ դեպքերում՝ պատվիրատուների ուսերին»:
Աղբյուր` Panorama.am